Қонунчилик палатасида ЎзЛиДеП фракциясининг навбатдаги йиғилишида депутатлар «Ўзбекистон Республикасининг Меҳнат кодексини тасдиқлаш тўғрисида»ги қонун лойиҳаси муҳокамаси юзасидан ўз фикрларини билдириб ўтди. Бу ҳақда Олий Мажлис Қонунчилик палатаси матбуот хизмати хабар қилди.
Депутатлар агар дам олиш куни якшанба кунига тўғри келиб қолса, унда навбатдаги иш куни дам олиш куни сифатида эълон қилинадими, дам олиш куни ишга чиқиш сўралганлар ёки шунга мажбур этилганлар-чи, улар қандай йўл тутиши керак каби саволларни ўртага ташлади.
Янги таҳрирдаги Меҳнат кодекси қонунчиликда белгиланган байрам кунлари агар якшанба кунига тўғри келса, унда душанба куни дам олиш кунига қўшиб беришни назарда тутади.
Таъкидланишича, лойиҳа қуйи палатанинг 7 октябрдаги йиғилишида биринчи ўқишда муҳокама қилинган.
«Ўтган вақт давомида ишчи гуруҳи қонун лойиҳасини иккинчи ўқишга тайёрлаш жараёнида билдирилган фикр-мулоҳаза ва таклифлар асосида лойиҳани мутахассислар ва экспертлар иштирокида муҳокама қилиб, уни пишиқ-пухта ҳолатга келтирди», — дейилади хабарда.
Депутатларнинг фикрича, янги таҳрирдаги Меҳнат кодексининг қабул қилиниши амалиётда қатор қулайликларни яратади.
«Бунда бозор иқтисодиёти талабларини ҳисобга олган ҳолда ходимлар ва иш берувчилар манфаатларининг мувозанати таъминланади, уларнинг ижтимоий ҳамкорликка жалб қилиниши ортиб, томонларнинг меҳнат натижадорлигига қизиқиши рағбатлантирилади», — дейилган қуйи палата хабарида.
Изоҳ (0)