АҚШ махсус операция кучлари ва Денгиз пиёдалари корпуси контингенти Тайванда маҳаллий қўшинларни махфий равишда ўқитмоқда. Бу ҳақда АҚШнинг юқори мартабали амалдорига таяниб The Wall Street Journal (WSJ) хабар берди.
Манбага кўра, АҚШ махсус операция кучларининг 20 га яқин ходими Тайвань қуруқлик қўшинларининг кичик гуруҳини шуғуллантирмоқда. Денгиз пиёдалари, ўз навбатида, маҳаллий денгиз флоти билан ишлаяпти. Манбанинг аниқлик киритишича, АҚШ ҳарбийлари Тайванда камида бир йилдан буён бўлиб турибди.
Нашрнинг қайд этишича, Оқ уй ва Пентагон Тайванда АҚШ ҳарбийлари борлиги ҳақидаги маълумотга изоҳ беришдан бош тортган.
Ғарб ОАВлари хабар беришича, Хитой Халқ Республикаси (ХХР) ташкил топган кун нишонланган 1 октябрдан бошлаб, Тайвань яқинида ХХР авиацияси ортгани кузатилмоқда. Тайвань расмийлари мамлакатнинг бир томонлама эълон қилинган ҳаво ҳужумига қарши мудофаа зонасида 4 октябрь, душанба куни ХХР ҳаво кучларининг 56 самолёти учирилгани ҳақида хабар берди. Ҳисоботларда қайд этилишича, душанба ва ундан олдинги уч кун давомида Хитойнинг 148 та ҳарбий самолёти ушбу ҳудуд орқали учиб ўтган.
АҚШ Давлат департаменти Хитойнинг бундай ҳаракатларидан жуда хавотирда эканини билдириб, уларни провокацион деб атади. Тайвань мудофаа идораси раҳбари Цю Гочжэн, ўз навбатида, 2025 йилга келиб Пекин Тайвань муаммосини ҳарбий куч ёрдамида ҳал қилишга тўлиқ тайёр бўлишини айтди.
Тайвань масаласи 1949 йилда коммунистик Хитой Халқ Республикаси эълон қилиниб, Гоминдан партиясининг бир қисми Тайвань оролига жойлаштирилганда пайдо бўлган. Пекин «ягона Хитой тамойилини» талаб қилмоқда, унга кўра, бир вақтнинг ўзида ҳам ХХРни, ҳам Тайвандаги Хитой Республикасини тан олиб бўлмайди. Шу билан бирга, деярли барча йирик давлатларида Тайбэйнинг норасмий маданий ва иқтисодий идоралари мавжуд.
Пекин ва Тайвань ўртасидаги муносабатлар 2008—2016 йиллар мобайнида анча яхшиланди, ўшанда Тайвань маъмурияти раҳбари, Гоминдан раиси Ма Инцзю эди. Бироқ 2016 йилда Сай Инвэн Тайвань маъмурияти раҳбари бўлганидан бери Пекин Тайванга ҳарбий босимни кучайтирди.
Изоҳ (0)