Зарафшон дарёсининг «Навоийазот» яқинидаги ҳудудида оммавий заҳарланиш юзага келиб, балиқлар нобуд бўлди

Навоий вилоятидан ўтган Зарафшон дарёсининг балиқлари оммавий равишда нобуд бўлгани аниқланди, дея хабар бермоқда Давлат экология қўмитаси.

Навоий вилояти Экология ва атроф-муҳитни муҳофаза қилиш бошқармаси инспекторлари ўз фаолиятини олиб боришда Зарафшон дарёсининг Кармана туманидан оқиб ўтувчи қисми сувининг ранги бироз ўзгаргани, балиқлар нобуд бўлаётганига жиддий эътибор қаратди.

Бошқарма бошлиғининг биринчи ўринбосари раҳбарлигида ташкил этилган тезкор ишчи гуруҳ томонидан бу ҳолатнинг сабаби ўрганилди.

Ўрганиш давомида бошқарманинг Аналитик лаборатория масъул ходимлари, Кармана тумани Экология инспекцияси давлат инспекторлари, вилоят Ветеринария лабораторияси ва «Навоийазот»нинг Санитар лабораторияси мутахассислари ҳамкорлигида дарёнинг 5 та нуқтасидан таҳлил намуналари олинди.

Натижада «Навоийазот»га қарашли (1-ташлама) 267-қудуқдан азот аммоний 21 маротаба, азот нитрат 2,6 маротаба, азот нитрит 60 маротаба, хлоридлар 1,3 маротаба, мис ионлари 2,1 маротаба белгиланган меъёрлардан юқорилиги ҳамда дарёда оммавий заҳарланиш юзага келганлиги аниқланди.

Ҳозирда мазкур ҳолат бўйича дастлабки ўрганиш-суриштирув ишлари давом этмоқда. Унинг якуни бўйича қўшимча маълумот берилиши таъкидланган.

Бундан аввал Сурхондарёда Қизил китобга киритилган сиртлон овлангани бўйича тарқалган хабарлар юзасидан маълумот берилгани, Қорақалпоғистонда Қизил китобга киритилган 11 бош жайронни овлаган шахслар аниқлангани ҳамда Жиззахда овлаш тақиқланган балиқларни овлаган шахсга нисбатан жиноят иши қўзғатилгани ҳақида хабар берилганди.