Ўзбекистон Ички ишлар вазирлиги фуқаролардан ўзларининг шахсий маълумотларини ижтимоий тармоқларга жойлаштирмасликни, Telegram’да шахсий маълумотларини тарқатмаслик эвазига пул талаб қилаётган шахслар борлиги ҳақида огоҳлантириш билан чиқди.
Маълум қилинишича, сўнгги вақтларда Telegram тармоғида товламачилик йўли билан даромад орттириш мақсадида бўлган айрим шахслар ижтимоий муҳандислик («социалная инженерия») услуби билан фуқароларнинг шахсий ҳаётига оид маълумотларни (фотосурати, исми, шарифи, телефони, манзили ва бошқалар) тўплаб, кейинчалик уларни шаъни ва обрўсига путур етказувчи постлар кўринишида ижтимоий тармоқларда тарқатмаслик эвазига пул маблағларини талаб қилаётгани кузатилмоқда.
Таъкидланишича, ҳозирги кунда Ўзбекистонда бундай каналлардан бир нечтаси аниқланган бўлиб, уларни юритувчилар хориж давлатларидан туриб фаолият кўрсатади.
Ички ишлар вазирлиги томонидан ушбу ва бошқа турдаги жиноий фаолият билан шуғулланувчи барча каналларнинг юритувчиларини электрон манзиллари аниқланиб, ўрнатилган тартибда хорижий ҳамкорларни жалб қилган ҳолда терговга қадар текширувлар ўтказилмоқда. Текширув якунлари юзасидан товламачилик қилаётган шахсларга нисбатан қонуний чора кўрилади.
«Афсуски, ҳозирги кунда мазкур жиноий каналларни блоклашнинг техник имкониятлари мавжуд эмас. Шунинг учун каналлар номи ошкор этилмайди. Шу ўринда фуқаролардан ўзингизнинг шахсий ҳаётингизга алоқадор бўлган маълумотларни ижтимоий тармоқларга қўймасликни ёки бегона гуруҳ ва каналларга тарқатмасликни, акс ҳолда товламачиларнинг қурбонига айланишингиз мумкинлигини эслатиб ўтамиз», — дейилади хабарда.
Аввалроқ Ўзбекистон ИИВ жиноятларга қарши курашиш бўлими номидан фойдаланиб, фуқаролардан 240 минг сўм ундирилаётганидан огоҳлантирганди.
Мавзуга доир: ИИВ порнографик мазмундаги сайтларга кирганлардан пул талаб қилаётган хакерлар ҳақида огоҳлантирди
Изоҳ (0)