O‘zbekiston Ichki ishlar vazirligi fuqarolardan o‘zlarining shaxsiy ma’lumotlarini ijtimoiy tarmoqlarga joylashtirmaslikni, Telegram’da shaxsiy ma’lumotlarini tarqatmaslik evaziga pul talab qilayotgan shaxslar borligi haqida ogohlantirish bilan chiqdi.
Ma’lum qilinishicha, so‘nggi vaqtlarda Telegram tarmog‘ida tovlamachilik yo‘li bilan daromad orttirish maqsadida bo‘lgan ayrim shaxslar ijtimoiy muhandislik (“sotsialnaya injeneriya”) uslubi bilan fuqarolarning shaxsiy hayotiga oid ma’lumotlarni (fotosurati, ismi, sharifi, telefoni, manzili va boshqalar) to‘plab, keyinchalik ularni sha’ni va obro‘siga putur yetkazuvchi postlar ko‘rinishida ijtimoiy tarmoqlarda tarqatmaslik evaziga pul mablag‘larini talab qilayotgani kuzatilmoqda.
Ta’kidlanishicha, hozirgi kunda O‘zbekistonda bunday kanallardan bir nechtasi aniqlangan bo‘lib, ularni yurituvchilar xorij davlatlaridan turib faoliyat ko‘rsatadi.
Ichki ishlar vazirligi tomonidan ushbu va boshqa turdagi jinoiy faoliyat bilan shug‘ullanuvchi barcha kanallarning yurituvchilarini elektron manzillari aniqlanib, o‘rnatilgan tartibda xorijiy hamkorlarni jalb qilgan holda tergovga qadar tekshiruvlar o‘tkazilmoqda. Tekshiruv yakunlari yuzasidan tovlamachilik qilayotgan shaxslarga nisbatan qonuniy chora ko‘riladi.
“Afsuski, hozirgi kunda mazkur jinoiy kanallarni bloklashning texnik imkoniyatlari mavjud emas. Shuning uchun kanallar nomi oshkor etilmaydi. Shu o‘rinda fuqarolardan o‘zingizning shaxsiy hayotingizga aloqador bo‘lgan ma’lumotlarni ijtimoiy tarmoqlarga qo‘ymaslikni yoki begona guruh va kanallarga tarqatmaslikni, aks holda tovlamachilarning qurboniga aylanishingiz mumkinligini eslatib o‘tamiz”, — deyiladi xabarda.
Avvalroq O‘zbekiston IIV jinoyatlarga qarshi kurashish bo‘limi nomidan foydalanib, fuqarolardan 240 ming so‘m undirilayotganidan ogohlantirgandi.
Mavzuga doir: IIV pornografik mazmundagi saytlarga kirganlardan pul talab qilayotgan xakerlar haqida ogohlantirdi
Izoh (0)