Ўзбекистон ташқи ишлар вазири Абдулазиз Комилов «Янги Ўзбекистон» газетасига берган интервьюсида мамлакатнинг Коллектив хавфсизлик шартномаси ташкилоти (ОДКБ)да иштироки қайта тикланиши тўғрисидаги саволларга жавоб берди.
Комиловга кўра, ташқи тажовуз ҳолатида қуролли кучлардан фойдаланиш ҳуқуқи инкор этиб бўлмайдиган ҳодиса ва аксарият мамлакатларнинг хавфсизлик соҳасидаги миллий концепциялари, шунингдек, ҳарбий-сиёсий блок шаклидаги турли бирлашмалар доктриналарининг ажралмас қисми ҳисобланади.
«Ўзбекистон эса ҳамиша барча масалаларнинг, айниқса, узоқ ўн йилликлар мобайнида барча қўшни мамлакатларда ташвиш уйғотиб келган Афғонистондаги низонинг тинч йўл билан ҳал этилишини ёқлаган ва ёқлайди. Биз афғон муаммосини ҳал этишнинг ҳарбий йўли йўқ эканини доимо таъкидлаб келганмиз. Бугунги кунда жаҳон ҳамжамиятида бу нуқтаи назарга кўпчилик хайрихоҳлик қилмоқда. Афғонистондан халқаро коалиция қўшинлари олиб чиқилгани ҳам бизнинг ёндашувимиз тўғри эканини кўрсатди», — дейди Комилов.
Шунингдек, Абдулазиз Комилов Ўзбекистон миллий қонунчилиги, жумладан, Ташқи сиёсий фаолият концепцияси ва Мудофаа доктринасига мувофиқ, мамлакат ҳарбий блокларда иштирок этмаслиги тўғрисида бир-неча бор баёнот берилганини эслатиб ўтган.
«Бундан ташқари, бугунги кунда мамлакатимиз ўз миллий хавфсизлигини таъминлаш учун етарли салоҳиятга эга экани ҳам амалий жиҳатдан ўта муҳимдир. Ўзбекистонда ҳарбий қурилиш соҳасидаги ислоҳотлар муваффақиятли бормоқда, миллий армиянинг ҳарбий-техникавий базаси мустаҳкамланмоқда», — дея қайд этади ташқи ишлар вазири.
«Марказий Осиёда минтақа мамлакатлари йирик шериклар билан мулоқотининг ‘5+1’ шаклида мувозанатлашган механизмлар тизими мавжуд. Бундай платформалар Россия, АҚШ, Европа Иттифоқи, Хитой, Ҳиндистон, Жанубий Корея, Япония билан муносабатларда амал қилмоқда. Шунинг билан биргаликда, минтақада КХШТдан ташқари, МДҲ ва ШҲТ сингари ташкилотлар ҳам фаолият кўрсатмоқда. Уларнинг доирасида долзарб масалалар, хусусан, минтақавий хавфсизлик таъминланишига, шунингдек, Афғонистон муаммосига доир масалалар муҳокама этилмоқда.
Яқинда Душанбе шаҳрида бўлиб ўтган ва Афғонистондаги вазиятнинг муҳокамасига бағишланган КХШТ саммити ҳамда ШҲТ+КХШТ форматидаги учрашувда Ўзбекистон фахрий меҳмон, шунингдек, ШҲТ аъзоси сифатида иштирок этгани ҳам вазмин ва амалий дипломатиямизнинг таркибий жиҳати ҳисобланади», — дейди у.
Эслатиб ўтамиз, Ўзбекистон ташқи ишлар вазири Абдулазиз Комилов 2017 йили Ўзбекистон КХШТга қайта аъзо бўлмаслигини маълум қилган эди. Ўшанда вазир Ўзбекистон ўзининг ҳеч қандай ҳарбий ёки сиёсий блокларга қўшилмаслик концепциясига содиқ қолишини таъкидлаган эди.
Изоҳ (0)