Шоҳрух Хоннинг тўнғич ўғли 23 яшар Арьян Хон Мумбайдаги Cordelia Cruises кемасида ўтказилган рейддан сўнг Наркотик моддаларни назорат қилиш бюроси томонидан ҳибсга олинди, деб хабар беради «News.day.аz».
Маълумотларга кўра, Болливуд юлдузи Шоҳрух Хоннинг ўғли Арьян Хон наркогуруҳга қўшилиб қолган. Арьян Хон 7 киши билан бирга 2021 йил 2 октябрь куни Мумбай-Гоа йўналиши бўйлаб саёҳатга чиққан круиз лайнерида ушланган. Ундан ташқари яна икки киши − Арбаз Сет Мерчант ва Мунмун Дхамеча иш бўйича асосий гумонланувчи сифатида кўрилмоқда.
Арьян Хоннинг вакили сифатида адвокат Сатиш Манешинде тайинланган.
Шоҳрухнинг ўғли Арьян бир вақтнинг ўзида «Гиёҳвандлик воситалари ва психотроп моддалар тўғрисида»ги қонуннинг бир нечта моддалари билан, жумладан, гиёҳванд моддаларни истеъмол қилиш, ишлаб чиқариш, сақлаш ва сотиб олишда айбланмоқда. Ҳибсга олинганидан кўп ўтмай, актёрнинг ўғли тиббий кўрикдан ўтиш учун Мумбайдаги JJ касалхонасига олиб кетилган.
2021 йил 2 октябрь куни Гиёҳванд моддаларни назорат қилиш бюроси (NCB) Мумбай соҳиллари яқинидаги саёҳат кемасида кетаётган партияга рейд уюштирди. Шунда машҳурларнинг фарзандларидан бири ҳибсга олингани ҳақида хабарлар тарқалди, кейинроқ у Шоҳрух Хоннинг ўғли Арьян Хон эканлиги маълум бўлди.
«Биз холис ҳаракат қиляпмиз. Агар бу жараённинг Болливуд ёки бадавлат одамлар билан алоқаси бўлса, шундай бўла қолсин. Биз қонун ва ваколатларимиз доирасида ҳаракат қиламиз.
Мумбайдаги олиб борилаётган ишлар давом этади. Агар маълумотларга қаралса, мазкур йилда 300 дан ортиқ рейд ўтказилиши керак. Бу чет эл фуқаролари, киносаноати ёки бадавлат кишилар бўлишидан қатъи назар, давом этади», — дейди Мумбай Гиёҳванд моддаларни назорат қилиш бюроси (NCB) директори Самир Ванхедан.
Изоҳ (0)