Президент Шавкат Мирзиёев Сирдарё тумани «Ширин» маҳалласида яшовчи Дониёр Йўлдошев хонадонида бўлиб, оиланинг турмуш шароитлари билан танишди, деб хабар беради давлат раҳбарининг матбуот хизмати.
Таъкидланишича, хонадон соҳибининг 10 сотихли томорқасига мевали ва манзарали дарахтлар, сабзавотлар экилган. 30 бош наслдор курка боқилиб, бир йилда 25 миллион сўмгача қўшимча даромад олинмоқда.
Ўзбекистон Президенти бу саъй-ҳаракатларни маъқуллаб, мана шундай обод хонадонлар кўпайиши кераклигини таъкидлаган.
«Ҳудудларда юришим, ҳар кунги ҳаракатларимдан мақсад — одамларни рози қилиш, аҳоли жон бошига даромадни кўпайтириш. Илгари четга хом ашё сотардик. Ҳозир ҳаммасини мамлакатимизда қайта ишлаб, тайёр маҳсулот чиқаряпмиз. Корхоналар очиляпти, ёшларимиз, хотин-қизларимиз ишли бўляпти. Бундайлар кўпайиши, бунинг учун ривожланиш маҳаллада бўлиши керак. Маҳалла яхши бўлса, давлат кучли бўлади. Ёшларни билимли, ақлли қилиб тарбияласак, ўз йўлини, ишини топади», — дейди Шавкат Мирзиёев. Ташриф давомида юртга тинчлик, фаровонлик тилаб, дуо қилинди.
Аввалроқ Президент Шавкат Мирзиёев Сирдарё вилоятига ташрифи чоғида Гулистон шаҳрининг эски деҳқон бозори ўрнидаги 42 гектар майдонда Гулистон City барпо этишни таклиф қилгани тўғрисида хабар берилганди.
Изоҳ (0)