Аввал хабар берганимиздек, «Ўзметкомбинат» АЖ томонидан «Металлург» футбол клуби қошида Испаниянинг жаҳонга машҳур «Реал» (Мадрид) клуби билан ҳамкорликда, профессионал футболчиларни тайёрлаш тизимини ташкил этиш учун El Golazo Academy Powered by Real Madrid Foundation болалар ва ўсмирлар футбол академияси ташкил этилди. Бугун ушбу академиянинг очилиш маросими бўлиб ўтди.
Тадбирнинг расмий қисмида Тошкент вилояти ҳокими Даврон Ҳидоятов, Бекобод шаҳар ҳокими Зафар Файзуллаев, «Ўзметкомбинат» АЖ бошқаруви раиси, бош директор Рашид Пирматов, футбол академияси муассиси Зокиржон Холиқов, Испаниянинг Ўзбекистондаги фахрий консули Карлос Мартинес, ўзбек футболи афсонаси Тўлаган Исоқов, Испания терма жамоаси ва Реал Мадриднинг собиқ футболчиси ва бу машҳур клубнинг ҳозирги элчиси Альваро Арбелоа, Ўзбекистон Футбол Ассоциацияси биринчи вице-президенти Равшан Эрматов сўзга чиқдилар.
Улар мамлакатимизда футболга катта эътибор кўрсатилаётганлигини алоҳида таъкидлаб, бекободликларни янги футбол академияси билан табрикладилар, Бекободдаги футбол академияси ишига омад тиладилар. Жаҳон чемпиони, икки марта Европа чемпиони Альваро Арбелоа, Тошкент вилояти ҳокими Даврон Ҳидоятов, ЎФА биринчи вице-президенти Равшан Эрматов ва El Golazo компанияси муассиси Зокиржон Холиқов биргаликда рамзий тугмани босиб, футбол академиясини очиб беришди. Тантанали очилиш тадбиридан сўнг барча академиянинг бинолари, унда бунёд этилган шароитлар билан танишишга таклиф қилинди.
Бу футбол академияси шаҳримиздаги бўш турган саноат касб-ҳунар коллежи биноси ўрнида ташкил этилган бўлиб, масканда футболчиларни тарбиялаш учун барча шарт-шароитлар яратилган. Академия учун ажратилган бинолар энг замонавий талаблар асосида таъмирланиб, пардозланди. Замонавий техника ва ускуналар билан жиҳозланди.
Шундан сўнг Реал Мадриднинг собиқ футболчиси ва бу мазкур клуб элчиси Альваро Арбелоа, «Ўзметкомбинат» АЖ бошқарув раисининг биринчи ўринбосари, ижрочи директор Дилшод Аҳмедов ва El Golazo компанияси муассиси Зокиржон Холиқовлар иштирокида ОАВ вакиллари учун матбуот анжумани ташкил этилди.
Кўтаринки кайфиятда ўтган анжуманда академия фаолиятига оид барча саволларга жавоб берилди. Анжуман якунида Альваро Арбелоа академияда ташкил этилган меҳмонлар китобига ўзининг тилакларини ёзиб қолдирди. Анжумандан сўнг Альваро Арбелоа академия тарбияланувчилари учун маҳорат дарсини ўтиб берди ҳамда тарбияланувчиларга ўзининг зарур тавсияларини берди. Тадбир сўнгида Альваро Арбелоа давлатимиз раҳбарининг спортга, айниқса футболни ривожлантиришга бўлган юксак эътиборини алоҳида таъкидлаган ҳолда, ушбу муҳташам футбол академиясини ташкил топишида ўз ҳиссасини қўшган барчага миннатдорчилик билдирди. Шунингдек, у академиянинг очилиш маросимида қатнашганлигидан мамнунлигини билдирди.
Реклама ҳуқуқи асосида.
Изоҳ (0)