Куз қизиқарли образлар яратиш ва табиат гўзаллигидан илҳомланиб ранг-баранг кўриниш учун айни муддао ҳисобланади. Унда ноодатий кийиниш учун эса гардеробдан қуйидаги кийим-кечаклар ўрин олган бўлиши керак.
Свитер
Совуқда иссиққина юришни ва шу билан бирга ўзига хос кўринишни истасангиз, oversize услубдаги свитер харид қилишни унутманг. Уни деярли ҳамма кийим-кечак: кенг турадиган классик бичимли шим, джинси, плиссировкали юбка ва ҳатто шифон кўйлак билан ҳам мослашингиз мумкин.
Кенг турадиган, ёрқин ранглисини танланг, матоси иложи борича табиий бўлсин. Ёмғирли ҳаво учун шафтоли, лимон ранг ва яшил вариантлар айни муддао.
Костюм
80 йилларга хос жиддий услубда бичилган костюмлар совуқ мавсумда ҳар қачонгидан ҳам долзарб бўлади. Оч рангдаги моделларни сандиққа солиб, классик кўринишдаги катак принтли вариантларга эътибор қаратинг. Жун ёки қаттиқ пахта матосидан тикилган Chanel ва Chloé, Calvin Klein’дан тортиб Max Mara’гача бўлган брендлар тақдим қилган коллекциядан бу борада илҳомлансангиз бўлади. Классик шим, миди узунлигидаги ёки бурмали калта юбка бундай oversize услубидаги устки кийим билан ҳам жуда ўзига хос кўринади.
Классик услубдаги пальто
Қаймоқ ранг, кўриниши халатни эша соладиган универсал пальтолар ҳеч қачон урфдан қолмайди. Унинг боғичи ёки чўнтакли вариантни олиш ўз хоҳишингизга боғлиқ. Ранг борасида яшил, тўқ қизил пальтоларга эътибор қаратиш тавсия қилинади.
Кроссовка
Кроссовкалар бошқа спорт услубидаги худи, устки кийим ва пойабзаллар сингари бу мавсумда ҳам урфда. Таг қисми қалин футуристик услубдаги моделларни кийим билан мослаш борасида асло чекланмаслик керак. Уларни шифон ва ҳатто нўхат принтли костюмлар билан кам бирга уйғунлаштирса бўлади.
Джинси матосидан тикилган кийим-кечаклар
Куз-қиш мавсуми учун гардеробингизни джинсидан тикилган кийим-кечак: шим, юбка, сарафан, комбинезон ва ҳатто куртка билан ҳам бойитишингиз мумкин. Турли кенг бичимдаги моделларга эътибор қаратишингиз, уларни исталган қалин свитер билан мослашингиз ва образни спорт услубидаги пойабзалдан ташқари, классик моделлар билан ҳам тугатишингиз мумкин.
Тренч
Куз ва қиш учин классик услубдаги оч жигарранг, белбоғ ва тугмали устки кийим яъни тренчлардан-да, яхшироғи бўлмайди. Уни ранг-баранг кийимлар устидан кийиш, шарф ёки рўмол билан ўраб қизиқарли образга эга бўлиш мумкин. Айнан қандайини танлашни билмаётганлар МСGM ва Antonio Marras брендлари тақдим қилган вариантлардан илҳомланиши мумкин.
Бачкана бўлмаган сумкалар
Ичига ҳамма нарса сиғадиган, чарм матосидан тикилган ва шу билан бирга жиддий услубдаги сумкаларсиз кузги образ тамоман ўзига хос кўринмайди. Уларни қандай рангдалигини танлаш эса дидингиз ва хоҳишингизга ҳавола.
Катак-катак принтли жакет
Катак-катак устки кийимлар ҳамиша долзарблигини йўқотмаган ва шу билан бирга мазкур мавсумда ҳар қачонгидан етакчи экани билан эътиборлига молик. Костюм, жакет ёки пальтонинг шунчаки катаклиги эмас, бошқа принт аралашганини ҳам ҳеч иккиланмай танласангиз бўлади. Салқинда ичидан свитер кийиб кўнгилдагидек кўринишга эга бўлишингиз ҳамда иссиққина юришингиз мумкин.
Кўйлак
Кўйлаклар борасида қаттиқ матодан тикилган ва ортиқча деталларсиз моделларга эътибор қаратинг. Кенг бичимлиси билан камар тақишингиз ёки устидан жемфер ва ботфорд кийишингиз мумкин. Қанчалик ғалати туйилмасин шифон, атлас ва ипак матосидан тикилган кўйлаклар куз учун универсал вариант ҳисобланади. Уларни қалин чокли жемферлар, жинси куртка билан кийиб ноодатий кўринишга эга бўлишингиз мумкин.
Плиссировкали юбка
Миди узунлигидаги плиссировкали юбкани исталган кофта ва пойабзал билан офис ёки ўқишга кийсангиз бўлади. Янги мавсумда эса чарм, бахмал матодан тикилган носимметрик бичимлар долзарб бўлади. Унинг устидан камар тақиб, катак принтли жакетлар билан мослашингиз мумкин. Қанча қалин матодан тикилган ва тўқ рангли бўлса, шунча яхши.
Қаттиқ матодан тикилган комбинезон
Бир вақтлар яхши кўриб кийган кейинчалик эса сандиққа жойлаб қолган комбинезонларни бемалол олиб кийишингиз мумкин. Қаттиқ пахтадан, джинси ва асосан костюм тикишда ишлатиладиган матоли моделлар бўлса яна яхши. Бу борада Кендалл Женнер, Белла Хадид ва Виктория Бекҳэм сингари мода ихлосмандларининг образидан илҳомланишингиз мумкин. Бундай комбинезонни пошнали ёки боғичли ботинкалар билан ҳеч иккиланмасдан мосласангиз бўлади.
Олд қисми учли этиклар
«Казаки» сифатида маълум бўлган учли, аммо пошнаси қулай мазкур пойабзаллар билан жуда ҳам нафис ва дидли кўринишингиз мумкин. Қолаверса, бундай пойабзаллар исталган образга мос тушиши билан ҳам ўзига хосдир. Шифон кўйлак, жинси ёки қалин матодан тикилган миди узунлигидаги юбка — қай бирини танлаш ўзингизга ҳавола.
Белга урғу берадиган камар
Ранг-баранг, деталлари бор ва чарм матоли камар исталган зерикарли образга ўзига хослик бағишлаши мумкин. Янги мавсумда оч чармдан тикилган, кенг моделлар урфда бўлади. Уларни oversize услубидаги свитер, жакет ва кенг тренч устидан ҳам тақса бўлади.
Мавзуга доир:
Изоҳ (0)