Суд Бритни Спирснинг отасини васийликдан четлатди

Лос-Анжелес суди қўшиқчи Бритни Спирс фойдасига унинг отасини васийликдан четлатиш бўйича қарор чиқарди, деб хабар беради Esquire.

Шу орқали судья қўшиқчининг адвокати даъвосини қаноатлантирган. У ҳозирги вазиятни «номақбул» деб топган ва Жеймс Спирсни қўшиқчининг фойдаси учун васийликдан четлатган.

Бритни Спирснинг менежери Жоди Монтгомери унинг вақтинча васийси сифатида қолади. Суд қўшиқчининг молиявий масалалари бўйича назоратни бухгалтер Жон Забелга топширган. Ноябрь ойида ўтказиладиган яна бир суд мажлисида васийликнинг барча ҳолатлари бўйича якуний қарор қабул қилинади.

Қўшиқчининг ўзи суд эшитувида иштирок этмаган. Суднинг қароридан сўнг, Бритни Instagram’даги саҳифасига биринчи бор мустақил самолётда учаётгани ҳақида пост қолдирган. «Тўққизинчи осмонда!», — деб ёзади Бритни Спирс.

https://www.instagram.com/p/CUbMCJKsRbJ/

Эслатиб ўтамиз, Бритни Спирс ва унинг отаси ўртасидаги суд жараёнлари бир неча йилдан буён давом этиб келади. Қўшиқчи 2008 йил руҳий касалхонага тушганидан буён отасининг васийлигидан қутулишга уринади. Айни вақтда Жейми қизининг шахсий муносабатларидан тортиб молиявий аҳволигача бўлган ҳаётининг барча жабҳаларини назорат қилади.

Аввалроқ Netflix Бритни Спирс ҳақидаги ҳужжатли фильмнинг биринчи трейлерини тақдим этгани тўғрисида хабар берилганди.