Моделликдан актрисаликка: Карьерасини подиумдан бошлаган Болливуд юлдузлари (фото)

Актриса бўлиш учун, албатта, маҳорат билан биргаликда ташқи кўриниш ҳам меъёрида бўлиш зарур. Шунингдек, қомат, бўй каби ўлчовлар ҳам инобатга олинади. Аксарият юлдузлар кино оламига кирмасдан аввал моделлик билан шуғулланган. Болливуд юлдузлари орасида ҳам карьерасини подиумдан бошлаган, ҳаттоки «Дунё гўзали» мақомига эришганлари ҳам бор. Уларни эътиборингизга ҳавола этамиз. 

Дипика Падуконе

Дипика актриса бўлишдан аввал модель, ундан ҳам аввалроқ спорт билан шуғулланган. Бўлажак актриса ҳаттоки ҳукумат даражасида бадминтон бўйича ютуқларга эришган. Унинг гўзаллиги ва қатъиятлилиги тезда модель бўлиб фаолият юритишига сабаб бўлди. Дипиканинг Болливуддаги дебюти Шоҳрух Хон билан иштирок этган «Ом Шанти Ом» фильми бўлди. Шундан кейин у ҳеч қачон ортига қарамади ва кино оламига бутунлай ўтиб кетди. Эндиликда Дипика Падуконе Болливуднинг тенги йўқ маликаси.

Бипаша Басу

Бенгал гўзали Бипаша Басу ҳам супермодель эди. У 14 ёшидан реклама роликларида иштирок этган ва Ҳиндистондаги етакчи дизайнерлар учун подиумга чиққан. Кейин у «Ажнабий» лойиҳаси билан катта экранда дебют қилди ва ўшандан бери жозибали кўриниши билан томошабинларни ўзига жалб қилди.

Приянка Чопра

У 2000 йилда «Дунё гўзали» танловида ғолиб бўлиб, барча ҳиндларнинг ғурурланишига сабаб бўлди. Кейинчалик Приянка Болливуддаги дебютини Акшай Кумар билан «Булутлар устидаги севги» фильмида ижро этди. Актриса нафақат ўз ватанида, балки  Голливудда «Куантико» сериалидаги ФҚБ агенти ролини билан ҳам машҳур.

Лара Датт

Лара ҳам дастлаб ўзини моделликда синаб кўрган ва 2000 йилда «Коинот гўзали» танловида ғолиб чиқди. У ҳам Приянка билан биргаликда у «Булутлар устидаги севги» фильмида дебют қилди, аммо унинг Болливуддаги йўли Приянка Чопра каби муваффақиятли бўлмади.

Сушмита Сен

Сушмита – 1994 йилда «Ҳиндистон ва коинот гўзали» унвонига сазовор бўлган модель. У Болливудда «Мен нега севиб қолдим?» фильмида дебют қилган ва кетма-кет бир нечта фильмларда суратга тушган. Сушмита Сен кўплаб аёллар учун илҳом манбаси. Шунингдек, актриса икки қизни якка ўзи асраб олган ва уларнинг тарбияси билан банд.

Аишвария Рай

Баччан оиласининг келини ҳам модель ҳамда 1994 йилги «Дунё гўзали» танлови ғолибаси. У Болливудда дебютини «Улар бир-бирини севди» фильмида ижро этди ва кейинчалик карьерасида кўплаб нуфузли мукофотларни қўлга киритди.