Ҳоким сифатидаги биринчи маошини камбағалларга берган Ғузор тумани ҳокими Бекзод Суюнов сектор раҳбарлари орасида учинчи ўринни қўлга киритгани учун ўзига берилган 5 миллион сўм мукофот пулини ҳам эҳтиёжмандларга илинди. Бу ҳақда туман ҳокимлиги ахборот хизмати маълум қилди.
Қайд этилишича, Бекзод Суюнов сектор раҳбари сифатида эришган ютуқлари сабаб вилоятдаги 60 та сектор раҳбари орасида 3-ўринни эгаллаган. Унга бунинг учун вилоят ҳокими Зоир Мирзаев томонидан 5 миллион сўм пул мукофоти берилган.
«Туман ҳокими 27 сентябрь куни ушбу 5 миллион сўм пул мукофотини икки нафар фарзанди билан 25 йилдан бери ижарада яшаб келаётган Марзия Эргашевага ҳадя қилиб, уй-жой қуришда кўмаклашмоқчилигини билдирди», — дейди ҳокимнинг матбуот котиби Худойберди Йўлдошев.
Қўшимча қилинишича, ҳоким фуқаро турар жой қурилишини бошласа, яна қурилиш материалларидан ҳам ёрдам қилишини маълум қилган.
«Бу совғадан хурсанд бўлган Марзия опа кўзида ёш билан Президентимиз ва мутасаддиларга миннатдорчилик билдирди», — дейилади ҳокимлик расмий Telegram каналидаги ахборотда.
Вилоят ҳокимлиги ахборот хизматининг қайд этишича, вилоятда сектор раҳбарлари ўртасида бўлиб ўтган ўзаро беллашувда Косон тумани ҳокими Асрол Бойқараев биринчи ўринни қўлга киритиб, 15 миллион сўм пул муокофти билан, Нишон тумани ҳокими Мухтор Ҳайитмуродов эса иккинчи ўринни қўлга киритиб, 10 миллион сўм пул мукофоти билан тақдирланган.
Изоҳ (0)