Ўзбекистоннинг ташқи активлари қиймати камайди. Бунга 2021 йил бошидан бери олтиннинг қарийб 200 долларга арзонлашгани сабаб бўлган

Ўзбекистон ташқи активларининг қиймати олтин нархининг пасайиши ҳисобига қисқарди. Бу ҳақда Марказий банкнинг Ўзбекистон тўлов баланси, халқаро инвестицион позицияси ва ташқи қарзи бўйича эълон қилинган 2021 йил I ярим йиллик ҳисоботида сўз боради.

2021 йилнинг I ярим йиллиги якунига кўра давлат бошқаруви секторининг жами активлари 2 фоизга ёки 755,3 миллион долларга қисқариб, 34,2 миллиард долларни ташкил этган. Ушбу қисқариш, асосан, валюта захираларидаги валюта ва депозитлар қолдиғи 766,1 миллион долларга камайиши билан боғлиқ.

Маълумот учун, давлат бошқаруви секторининг мажбуриятлари давлатнинг ташқи қарзидан иборат. Бунда портфел инвестициялари бўйича Молия вазирлиги томонидан халқаро молия бозорида жойлаштирилган еврооблигациялар нархларининг йил бошига нисбатан 68,2 миллион долларга пасайиши кузатилган бўлса, кредитлар ва қарзлар бўйича норезидентлар олдидаги мажбуриятлар янги қарздорликларнинг жалб қилиниши натижасида 315,1 миллион долларга ортган. Натижада давлат бошқаруви секторининг жами мажбуриятлари ҳисобот даврида 1 фоизга ёки 243,2 миллион долларга ўсиб, 1 июль ҳолатига кўра 16,8 миллиард долларни ташкил этган.

Аввалроқ Ўзбекистон олтин-валюта захираси 1 сентябрь ҳолатига кўра 35,4 миллиард долларни ташкил этгани, бу август ойи билан таққослаганда у 320 миллион долларга ошгани тўғрисида хабар берилганди.