Қашқадарёда ота 2 ёшли ўғлини уриб, комага туширди. У аввалги икки турмушидан бўлган фарзандларини ҳам калтаклаб келган

Қашқадарё вилояти ИИБ ижтимоий тармоқларда тарқалган ўқитувчи ота ўз фарзандига шикаст етказгани айтилган видеодаги ҳолат бўйича расмий маълумот берди.

NasafNews нашрининг YouTube’даги каналида эълон қилинган видеода аёл 2 ёшли фарзандига турмуш ўртоғи томонидан жароҳат етказилгани айтилган.

«Икки нафар фарзандим бор: бири 2 ёш, иккинчиси 1 ёшда. Турмуш ўртоғим ўқитувчи. Соат 17:00 ларда ишдан келди. Болаларимнинг кичкинаси бешикда, иккинчиси ерда ётганди, иккисининг ҳам қўлида печенье бор эди. Дадаси қараб турар, деб каттасини кўрпачага қўйдим. Шу пайт мол келган экан, уни қўрага қамаш учун 20 дақиқага ташқарига чиқдим. Бу вақт ичида дадаси 2 ёшли боламни уриб, кўзига нотўғри маз суртиб, кўрмайдиган даражага олиб келган. Болани бўғган, калла қисмига роса урган. Келсам, боламни ҳушидан кетказиб, кўрпачага тўғри қилиб ётқизиб қўйибди. Болам кўкариб, музлаб қолган экан», — дейди она.

Унинг сўзларига кўра, эртаси куни турмуш ўртоғи ишга кетгач, қайнопасининг телефонидан ўз укасига қўнғироқ қилиб, олиб кетишини сўраган.

Аёлнинг таъкидлашича, эр биринчи турмушидан бўлган ўғлининг ҳам бармоқларини куйдириб ташлаган. Иккинчи хотинидан бўлган фарзандига эса пичоқ тираган. Шунингдек, эркак содир бўлган воқеалар ҳақида ИИБ ходимларига айтадиган бўлса, уни ҳам, болаларини ҳам ўлдириш билан таҳдид қилган.

Вилоят ИИБнинг маълум қилишича, 25 сентябрь куни вилоят ИИБ 102 операторига Деҳқонобод тумани «Теракли» МФЙда яшовчи уй бекаси Ж.С. қўнғироқ қилиб, вояга етмаган ўғли Э. Х.ни боланинг отаси Д.Ш. уриб тан жароҳати етказгани ва ўғли Республика шошилинч тиббий ёрдам илмий маркази Қашқадарё филиалининг жонлантириш бўлимида даволанаётганини маълум қилган.

Мазкур хабар Деҳқонобод туман ИИБда 25 сентябрь куни қайд қилинган.

РШТЁИМ Қашқадарё филиалининг маълумотномасида вояга етмаган Э.Х.нинг танасида қўшма шикастланиш, бош мия лат ейиши, юз соҳасининг ўнг томони шилинмаси, бўйинда усти пўстлоқлашган тери жароҳати, шу соҳаларда юмшоқ тўқиманинг лат ейиши кўринишидаги жароҳатлар борлиги кўрсатилган.

Мазкур ҳолат юзасидан Деҳқонобод туман ИИБ ҳузуридаги Тергов бўлинмаси томонидан терговга қадар текширув ҳаракатлари олиб борилмоқда.