Шавкат Мирзиёев «Саховат» уйига ташрифидан сўнг Намангандаги сафарини якунлаб, Фарғонага жўнаб кетди

Президент Шавкат Мирзиёев 2021 йил 19 февраль куни Наманган шаҳридаги «Саховат» уйини бориб кўрган, нуронийлар учун янги бино қурилишига ваъда берган эди.

Қайд этилишича, шундан сўнг бу ерда улкан бунёдкорлик ишлари амалга оширилди. 120 ўринли янги «Саховат» уйи биноси, 4 та коттеж қурилди. Маъмурият ва хўжалик бинолари таъмирланиб, электр энергияси, сув, иситиш тармоқлари янгиланди.

Шавкат Мирзиёев вилоятга навбатдаги ташрифи чоғида у ерга яна бориб, кексалар учун яратилган шароитларни кўздан кечирди.

«Саховат» уйида ҳар бир яшовчи учун алоҳида хона ажратилган бўлиб, хоналар телевизор, музлатгич, мебель билан жиҳозланган. Ошхона, муолажа ва физиотерапия хоналари, сув ҳавзаси, тренажёр зали бир бинода жойлашгани кексаларга қулайлик яратган. Нуронийлар вақтини мазмунли ўтказиши учун дам олиш жойлари, кутубхона ташкил этилган.

Зиёратларга бориш учун «Саховат» уйига Президент совғаси — Isuzu автобуси ҳам берилган.

Шавкат Мирзиёев янги манзилга келиб, нуронийлар билан суҳбат қурди ва ўша кунни эслади.

«Ўша куни роса кеч бўлиб, ҳамма чарчаганди. Аммо бир нима бўлди-ю Худо кўнглимга солди. Ёнимдагиларга ‘Саховат уйи’га борамиз десам, улар мени бошқа жойга олиб боришди. Меҳрибонлик уйига бордик. Лекин барибир кўнглим тинчимади.

Тошкентга қайтаётган пайт ‘йўлни буринғ дедим. ‘Э, у жойга олиб борадиган йўллар ёмон, шарт эмас’ дейишди. ‘Хўп, отда борса бўлар’, дедим. Ўшанда Худонинг ўзи йўл кўрсатганди.

Тошкентга бориб ҳам, ҳурматингизни жойига қўйиш ҳақида кўп ўйладим. Ахир, давлат раҳбари сифатида сизларга шароит яратиб бериш — менинг вазифам. Бугун мана шундай янги шароитларингизни кўриб, оғирингиз енгил бўлганини ҳис қилиб, ўзимни бахтиёр сезяпман. Сизлар ҳаётдан рози бўлсаларингиз, Аллоҳ биздан рози бўлади, юртимиз тинч, ишимизда барака бўлади.

Мана сизнинг янги уй, янги шароитингизни кўриб, сал бўлса-да мушкулларингизни енгил қила олганимиз учун ўзим ҳам бугун руҳан енгиллашдим», — деди президент.

Нуроний ота ва онахонлар яхши шароитлар, эътибор учун давлат раҳбарига миннатдорлик билдириб, юртга тинчлик-фаровонлик тилаб дуолар қилди.

Президент Шавкат Мирзиёев Наманган вилоятига ташрифини якунлаб, Фарғонага жўнаб кетди.