Исландияда парламент сайловларидаги овозларни санаш жараёни якунланди, деб ёзади «Korrespondent.net».
Сайлов якунларига кўра, ҳукмрон партиялар парламентда кўпчилик ўринни сақлаб қолмоқда. Бундан ташқари, Исландия тарихида биринчи марта парламентга кирадиган аёллар эркакларга қараганда кўпроқ бўлади (33 нафарга 30 нафар).
AFP маълумотларига кўра, бу нафақат Исландия, балки бутун Европада ҳам биринчи шундай ҳолатдир: қонунчилик органидаги аёллар сони бўйича шу пайтгача биринчи ўринни эгаллаб келган Швецияда депутат аёллар парламентдаги ўринларнинг 47 фоизини банд қилган. Исландияда эса бу кўрсаткич энди 52 фоиздан ошди.
Таъкидланишича, дастлаб ҳукмрон сиёсий кучлар жами 39 та мандатни қўлга киритиши прогноз қилинган эди. Аммо якунда улар 63 та ўриндан 37 тасига эга бўлди — худди аввалги Алтинг (Исландия парламенти)да фаолияти бошида бўлганидек.
Сайловларда бизнес тарафдори бўлган Мустақиллик партияси ғолиб бўлди, у овозларнинг 24 фоизини қўлга киритиб, энг кўп — 16 та мандатга эга бўлди. Ўз навбатида ҳукмрон коалициядан ўнг марказчиларнинг Прогрессив партияси парламентнинг аввалги таркибига таққослаганда бешта кўп — 13 та ўринга эга бўлди.
Айни вақтда сўл яшиллар 12,6 фоиз овоз тўплаб, учта мандатни қўлдан чиқарди — энди уларда 11 та ўрнига 8 та ўрин бўлади. Ваҳоланки, бу де-факто фақат битта ўрин йўқотилганини билдиради, чунки қолган икки депутат сайловдан кейин дарҳол партиядан чиқиб кетган эди. Халқ партияси 6 та мандатни қўлга киритди — бу қонунчилик органининг аввалги таркибидагидан иккитага кўп. Viðreisn — 5 та, Қароқчилар партияси ва социал-демократлар — 6 тадан, марказчилар партияси — 4 та мандатга эга бўлди.
Изоҳ (0)