22 сентябрь куни Халқ демократик партияси фракциясининг йиғилишида «Ўзбекистон Республикасининг Маъмурий жавобгарлик тўғрисидаги кодексига ўзгартиш ва қўшимчалар киритиш ҳақида»ги қонуни лойиҳаси биринчи ўқишда муҳокама қилинди, деб хабар беради Олий Мажлис Қонунчилик палатаси матбуот хизмати.
Ушбу қонун лойиҳасида фуқароларнинг эътирозларига сабаб бўлаётган айрим ҳуқуқбузарликлар учун жарималар миқдори пасайтирилган. Аммо лойиҳадаги айрим нормалар депутатларнинг қизғин мунозаларига сабаб бўлган.
ЎзХДП фракциясининг бир гуруҳ депутатларидан иборат Ишчи гуруҳи томонидан автотранспорт воситаларини бошқаришда йўлларда белгиланган тезликка риоя этилишини радарлар, шунингдек, стационар ва кўчма махсус техника воситаларидан фойдаланган ҳолда назорат қилиниши ўрганилган. Ўрганиш давомида фуқаролар томонидан бугунги кунда қўлланилаётган жарималар юқори экани бўйича ҳақли эътирозлар билдирилган.
Шундан келиб чиқиб, Маъмурий жавобгарлик тўғрисидаги кодексининг 128-3-моддаси иккинчи қисми санкциясидаги жарима миқдорини базавий ҳисоблаш миқдорининг уч баравари қилиб белгилаш бўйича таклиф билдирилган.
Маъмурий жавобгарлик тўғрисидаги кодексининг 128-3-моддаси (транспорт воситалари ҳайдовчиларининг белгиланган ҳаракат тезлигини ошириб юбориши) иккинчи қисмида транспорт воситалари ҳайдовчиларининг белгиланган ҳаракат тезлигини соатига 20 километрдан ортиқ, лекин 40 километрдан кўп бўлмаган катталикда ошириб юбориши ёки транспорт воситалари ҳайдовчиларининг белгиланган ҳаракат тезлигини соатига 20 километрдан кўп бўлмаган катталикда худди шундай ҳуқуқбузарлик учун маъмурий жазо қўлланилганидан кейин бир йил давомида такрор ошириб юбориши учун БҲМнинг беш баробари (1,35 миллион сўм) миқдорида жарима белгиланиши кўзда тутилган.
«Умуман, Маъмурий жавобгарлик тўғрисидаги кодексда назарда тутилган баъзи ҳуқуқбузарликлар учун тайинланган жазо чораларининг миқдори кодекснинг инсонпарварлик ва одиллик принципларига мувофиқ эмас», — дейди Олий Мажлис Қонунчилик палатаси депутати, ЎзХДП фракцияси аъзоси Фирдавс Шарипов.
Эслатиб ўтамиз, 2020 йилнинг сентябрида Ўзбекистонда автомобилнинг суғуртаси йўқлиги учун жарима майдончасига жойлаштириш амалиёти бекор қилинган эди.
Изоҳ (0)