Маданият ва санъатни ривожлантириш жамғармаси Тошкентдаги Романовлар саройи биносини реконструкция қилиш лойиҳасини амалга оширишни режалаштирмоқда. Бу ҳақда жамғарма матбуот хизмати «Дарё»га маълум қилди.
Қайд этилишича, Вазирлар Маҳкамасининг қарорига асосан 2019 йилда Маданият ва санъатни ривожлантириш жамғармаси Романовнинг собиқ қароргоҳини реконструкция қилиш ва Давлат санъат музейи филиали биносига жойлаштириш бўйича меъморий лойиҳани ишлаб чиқишни бошлади.
Ҳозирги вақтда дастлабки концепция тайёр ва у экспозиция режаси, бино қаноти учун меъморий ва режалаштириш ечими, юз йиллик дарахтларни сақлаган ҳолда қўшимча яшил майдонларни экиш ва мавжуд фаввораларни тиклаш бўйича ишлаб чиқилган ландшафт дизайни ва техник ишланмаларни ўз ичига олади. Концепциянинг асосий ғояси — жамоатчилик учун очиқ майдон яратиш. Ташриф буюрувчилар нафақат музей меҳмони бўлишлари, балки саройнинг боғ ҳудудида ҳам вақт ўтказишлари мумкин.
Саройни қайта тиклаш лойиҳасида ўзбекистонлик мутахассислар билан биргаликда ишлайдиган Ateliyer Brückner GmbH компанияси мутахассислари жалб қилинган. Германия компанияси мураккаб кўргазма лойиҳалари ва доимий музей экспозициялари учун архитектура майдонлари концепциялари ва дизайнини ишлаб чиқишга ихтисослашган.
Ateliyer Brückner GmbH’нинг муваффақиятли бажарилган лойиҳалари орасидан Мюнхендаги BMW музейи (2008), Брюсселдаги «Бу Опера» (That’s Opera) кўргазмаси (2008), Аугсбургдаги Тўқимачилик саноати музейи (2010), Амстердамдаги Миллий денгиз музейи (2011), Ҳемнитздаги Давлат археология музейи (2015), Сеулдаги Hyundai MotorStudio (2017) ва Гизадаги Буюк Миср музейи (2018) ўрин олган.
2018 йилда Брюкнер ательеси Свиккау шаҳридаги Август Хорх музейи меъморий ечими учун Архитектура форуми мукофотига сазовор бўлган. 2017 йилда Женевадаги Этнография музейи экспозицияларини лойиҳалаштиргани учун — ҳар йили бўлиб ўтадиган «Европа йил музейи» мукофотини қўлга киритди. 2016 йилда — Копенгагендаги (Den Bla Planet) Дания Миллий океанариуми реконструкцияси учун 12 та халқаро мукофот соҳиби бўлди.
Князь Николай Константиновичнинг саройи 1891 йилда меъморлар Вильгельм Гейнселман ва Алексей Бенуа томонидан қурилган. Икки қаватли бу бино кул ранг-сариқ рангли пишган ғиштдан ишланган ва мураккаб ҳажмли ва кенг майдонли дизайн ечимига эга. Сарой фасадлари нафис тўрли панжаралар, деразалар ва декоратив кичик миноралар билан безатилган. Кириш эшиги зинапоянинг ҳар икки томонидан соф ўлчамдаги ит ҳайкаллари билан қўриқланади, пойдеворларда бронза кийиклар жойлашган.
1935 йилда бино Ленин номидаги Пионерлар саройи бўлган. 1980 йилларда у қимматбаҳо буюмлар коллекцияси намойиш этиладиган музейга айланди. Мустақиллик давридан бошлаб, бино Ўзбекистон Ташқи ишлар вазирлигининг Қабул уйи сифатида хизмат қилган.
2020 йилда бинонинг ҳолати қандайлигини аниқлаш мақсадида фонд архивланган маълумотларни батафсил ўрганиб чиқди. Таҳлил давомида бино архитектурасининг аксар қисми асл тузилишини сақлаб қолганлиги аниқланди. Кейинчалик тарихий объект конструкциясининг барқарорлигини аниқлаш учун техник текширув ўтказилди.
Янги филиалда кейинги экспозицияларни жойлаштириш учун экспертлар Ўзбекистон Давлат санъат музейи фондидан йиғилган санъат асарлари коллекциясини алоҳида ўрганиб чиқди. Бир вақтлар саройни безаб турган мармар ва бронзадан ясалган ҳайкалларга қўшимча равишда, Ғарбий Европанинг рассомчилик коллекцияси, чинни буюмлар, интерьер буюмлари ва бошқа қимматли санъат асарларини музейга қайтариш режалаштирилган.
Изоҳ (0)