Bolaning o‘zini tutishni bilishi, boshqalar bilan munosabatda nimalarga e’tibor qaratish kerakligini anglashi uchun nafaqat oiladagi tarbiya, balki kitob va filmlarning ham ahamiyati katta.

Foto: “Liza”

“Mitti malika” (Rossiya, 1997)

Mazkur film Hindistondan Londonga kelgan va miss Manchin qizlar maktabida o‘qiydigan badavlat va shu bilan birga, qalbi toza hamda yaxshilikka hamisha shay bo‘lgan Sara Kru haqida hikoya qiladi. Otasi pansionda qoldirib ketgan qizaloq barcha tarbiyachi va xizmatchi xodimlar bilan do‘st tutinadi. Vaqt o‘tib otasi kapitan Kru qiziga meros qoldirmasdan vafot etgani ma’lum bo‘ladi. Qahramon qizga pansionda qolishga ruxsat beriladi, faqat xizmatkor sifatida. Ochlik, tahqirlanish va kamsitishlar qiz irodasini sindira olmaydi. Qiyinchiliklarni yenga olgan qiz taqdirida o‘zi ishonganidek baxtli kunlar oldinda bo‘ladi.

E’tiborga molik jihati

Ushbu filmni tomosha qilgandan keyin nima bo‘lgan taqdirda ham ortga chekinmaslik, ruhan kuchli bo‘lish va, eng asosiysi, ijtimoiy ahvolidan qat’iy nazar, barchaga teng munosabatda bo‘lish kerakligini yana bir bor tushunib yetasiz.

“Egizaklar: men va mening soyam” (AQSh, 1995)

Egizaklar Meri-Keyt va Eshli Olsen birga suratga tushgan eng birinchi filmlardan biri hisoblanadi. Badavlat xonadonning tarbiyali va o‘qimishli farzandi Alisa bilan yetimxonada o‘sgan shumtaka Amandaning fe’l-atvori tamoman bir-biriga o‘xshamaydi, ammo ularning ko‘rinishi bir xil. Tasodifan tanishib qolgan qahramonlar o‘rin almashishga kelishadi va keyinroq Alisaning otasi bilan Amandaning tarbiyachisining bir-biriga ko‘ngli tushib qolishi uchun harakat qiladi.

E’tiborga molik jihati

Qizlarning tarbiyasi, o‘zini tutishiga e’tibor qaratish, shu bilan birga, kimdir yaxshiroq, kimdir esa yomon degan xulosaga kelmaslik kerak.

“Kichik xonim” (Germaniya, Avstriya, 2012)

Nyu-Yorkda onasi bilan yashaydigan Emili kunlardan bir kuni grafinyaning nabirasi va yolg‘iz merosxo‘ri ekani haqida xabar topadi. Kichik qahramon Yevropaga, buvisining oldiga ketadi. Kibor xonim tarbiyasiz Amerikalik nabirasini tarbiyalashga kirishadi, ammo vaqt o‘tishi bilan Emili haqidagi fikri o‘zgaradi.

E’tiborga molik jihati

Urf-odatlar, tarbiya va qonun-qoidalar bo‘lgani yaxshi, ammo bu insonning samimiyati va oddiyligiga ta’sir qilmasligi kerak. Filmni tomosha qilish jarayonida farzandingizga inson o‘zini tuta bilishi o‘yin va ko‘ngil-ochishni inkor qilmasligi, shunchaki, hamma narsaning o‘z vaqti va joyi borligini tushuntiring.

“Malikaning kundaligi” (AQSh, 2001)

Enn Xeteuey ijrosidagi qahramon qiz Yevropadagi kichik davlatning merosxo‘r malikasi ekanidan xabar topadi. Atrofdagilar uchun yo‘qdek bo‘lib yurishga uringan va kamtar qizning buvisi uni malikalarga xos qilib tarbiyalamoqchi bo‘ladi. Shundan keyin qizning hayoti tamoman o‘zgaradi, ammo samimiy va ko‘ngilchanligi o‘sha-o‘shaligicha qoladi.

E’tiborga molik jihati

Tomosha qilish jarayonida qiz va buvisining o‘zini tutishi, boshqalar bilan qanday munosabatda ekaniga e’tibor qarating. Qahramonlarning turishi, o‘tirishi, suhbatga kirishishi bilan bog‘liq voqealarni farzandingiz bilan muhokama qiling. Shuningdek, kichkintoyga hukmronlik va hokimlik qilish faqat boy va mashhur bo‘lish emas, birinchi navbatda mamlakat, xalq oldidagi mas’uliyatli vazifa ekanini tushuntiring.