Шимолий Корея баллистик ракеталарни қандай мақсадда учирганини маълум қилди

Шимолий Корея 15 сентябрь куни янги темир йўл-мобил ракета полкининг жанговар тайёргарлигини синаб кўриш учун ракета учирган. Бу ҳақда Корея марказий телеграф агентлигига таяниб, «РБК» хабар берди.

«Ўт очишни синовдан ўтказишнинг мақсади — биринчи марта жангга татбиқ қилинган темир йўл-мобил ракета тизимининг амалийлигини тасдиқлаш, кутилмаган тарзда жанговар тайёргарлик ва янги полкнинг ўт очиш вазифаларини бажариш қобилиятини баҳолаш ва жанг тартибини ишлаб чиқиш», — дейилади хабарда.

Марказий телеграф агентлиги таъкидлашича, полк янги мудофаа стратегияси доирасида яратилган. Янги бўлинма «зарур ҳарбий-операцион вазиятда» душманга бир вақтнинг ўзида турли томондан зарба бериш қобилиятини ошириш учун керак, дейди агентлик. Хабарга кўра, полк машғулотлар пайтида марказий тоғли ҳудудга манёвр қилиб, 800 километр масофадаги нишонга зарба бериши керак бўлган. Нишон Япон денгизида жойлашган эди.

Синовларда Шимолий Корея раҳбари Ким Чен Ин қатнашмаган. Уларнинг боришини Корея Меҳнат партияси марказий қўмитаси котиби Пак Чон Чхон кузатиб турган. Котибнинг айтишича, келажакда полкни кенгайтириб, темир йўл-кўчма ракета бригадасига айлантириш режалаштирилган.

15 сентябрь куни Жанубий Кореянинг Yonhap агентлиги Шимолий Корея Япон денгизи томон иккита баллистик ракета учиргани ҳақида хабар берганди.

Кейинроқ КХДР агар Сеул Пхенян ҳақида «ноўрин» баёнотлар тарқаца, Жанубий Корея билан муносабатлар бузилиши мумкинлиги ҳақида огоҳлантирди.

КХДР етакчисининг синглиси ва Корея меҳнат партияси марказий қўмитаси раҳбарининг ўринбосари Ким Ё Чжоннинг айтишича, Жанубий Корея президенти Мун Чже Иннинг « Жанубий Корея янги ракеталарининг КХДРга етиб бора олиши ҳақидаги изоҳлари беъмани ва ачинарли». Унинг сўзларига кўра, Мун Чжэ Ин Шимолий Корея обрўсига путур етказишда давом этса, бу ўзаро муносабатларнинг узилишига олиб келиши мумкин.

Аввалроқ Жанубий Корея президенти сув ости базасидаги баллистик ракеталарни синовдан ўтказиш ҳақида гапирганди, унинг сўзларига кўра, ракеталар таҳдидларни олдини олиш ва миллий мудофаани таъминлаш учун жуда муҳим.

Шунингдек, КХДР иккита баллистик ракетани учиргандан сўнг Мун Чжэ Ин ушбу ҳодиса билан боғлиқ муаммоларни муҳокама қилиш учун Миллий хавфсизлик кенгашининг йиғилиши ўтказишни буюрди.