Ўн беш йилдан бери қидирувда бўлган бухоролик аёл Тошкент халқаро аэропортида қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, Бухоро туманининг Галаосиё шаҳрида рўйхатда турувчи 44 ёшли аёл — Р.С. 2006 йилда Жиноят кодексининг 135-моддаси 3-қисми (одам савдоси) билан айбланган. Тергов ҳаракатлари олиб борилаётган вақтда тергов органларидан яширингани учун унга нисбатан қидирув эълон қилинган.«Орадан 15 йил ўтиб, фуқаронинг Ўзбекистонга келаётгани ҳақида хабар топдик. Шундан сўнг вилоят ИИБ томонидан тезкор-қидирув тадбири уюштирилди. Аёл Ислом Каримов номидаги Тошкент халқаро аэропортида вилоят ички ишлар бошқармаси ходимлари томонидан қўлга олинди. Унга нисбатан жазонинг муқаррарлиги таъминланади», — дейди вилоят ИИБ ахборот хизмати раҳбари Шуҳрат Жалолов.
Изоҳ (0)