23-avgust kuni Toshkent shahrida o‘tkazilgan tadbirda 19 yashar yigit o‘zi bilan 12 dona geroin vositasini olib yurgani hamda yana 8 ta joyga shunday moddalarni yashirgani aniqlandi, deb xabar beradi UzNews.

Yigitning so‘zlariga ko‘ra, u bu ishni “Olx.uz” internet sayti orqali topgan. Giyohvandlik moddalarini kerakli joylarga berkitib qo‘yish evaziga unga maosh taklif qilishgan.

Yigitga nisbatan Jinoyat kodeksining 273-moddasi 5-qismi bilan (giyovandlik vositalari, ularning analoglari yoki psixotrop moddalarni ko‘p miqdorda qonunga xilof ravishda sotish) jinoiy ish qo‘zg‘atilib, qamoqqa olish chorasi ko‘rilgan.

Ma’lumot uchun, ushbu modda bilan ayiblangan shaxs o‘n yildan yigirma yilgacha ozodlikdan mahrum qilish bilan jazolanishi belgilangan.

Avvalroq Farg‘onada Tojikistondan qariyb 2 kilo gashish olib o‘tgan shaxs va uning sherigi DXX xodimlari tomonidan ushlangani, DXX O‘zbekiston bo‘ylab tezkor-qidiruv tadbirda 13,5 kilo giyohvand moddalarni musodara qilgani, buxorolik haydovchi ko‘p miqdordagi giyohvand modda bilan qo‘lga olingani to‘g‘risida xabar berilgandi.