O‘n besh yildan beri qidiruvda bo‘lgan buxorolik ayol Toshkent xalqaro aeroportida qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, Buxoro tumanining Galaosiyo shahrida ro‘yxatda turuvchi 44 yoshli ayol — R.S. 2006-yilda Jinoyat kodeksining 135-moddasi 3-qismi (odam savdosi) bilan ayblangan. Tergov harakatlari olib borilayotgan vaqtda tergov organlaridan yashiringani uchun unga nisbatan qidiruv e’lon qilingan.“Oradan 15 yil o‘tib, fuqaroning O‘zbekistonga kelayotgani haqida xabar topdik. Shundan so‘ng viloyat IIB tomonidan tezkor-qidiruv tadbiri uyushtirildi. Ayol Islom Karimov nomidagi Toshkent xalqaro aeroportida viloyat ichki ishlar boshqarmasi xodimlari tomonidan qo‘lga olindi. Unga nisbatan jazoning muqarrarligi ta’minlanadi”, — deydi viloyat IIB axborot xizmati rahbari Shuhrat Jalolov.
Izoh (0)