Синд вилоятида жойлашган ҳайвонлар бошпанасида туяга АҚШда тайёрланган махсус протез ўрнатилди. Бу Покистон тарихида йирик ҳайвонга биринчи марта протез қўйилиши бўлди.
2024 йил июнь ойида Кемми лақабли туянинг оёғи маҳаллий ер эгаларидан бири томонидан кесиб ташланди. Туя унинг даласига кириб кетгани учун эркак шу тариқа жониворни “жазолаган”.
Воқеа видеолари ижтимоий тармоқларда тарқалиб, жамоатчилик норозилигига сабаб бўлди. Шундан сўнг расмийлар ушбу ҳолатга эътибор қаратиб, туяни зудлик билан Карачидаги CDRS (Cоmprehensive Disaster Responce Services) бошпанасига олиб борди.
У ердаги шифокорлар ва ходимлар сўзларига кўра, туя оғриқ ва руҳий зарба сабаб айнан эркаклардан қаттиқ қўрқиб қолган эди. Бошпана раҳбари Шима Хоннинг айтишича, “Кемми чинқириб йиғлар, биз унинг юракни эзадиган нолаларига гувоҳ бўлар эдик”.
Туяни руҳий жиҳатдан тиклаш жараёни мураккаб кечди. Мутахассислар уни бошқа урғочи туя — Келли билан таништиришди, натижада туя Кемми илк бор уч оёғида туришга уриниб кўрди ва анча тинчланди.
Дастлабки даволаниш босқичларидан сўнг Кемми учун АҚШда ишлаб чиқарилган индивидуал протезга буюртма берилди. Протез ўрнатилгач, Кемми илк қадамларини ташлади. Ветеринар Бабар Ҳусайннинг сўзларига кўра, туя ҳали тўлиқ мослашмаган, аммо ҳар кунлик 15–20 дақиқалик машғулотлар орқали аста-секин протезга кўникиб бормоқда. Тўлиқ мослашув жараёни тахминан 2–3 ҳафта давом этади.
Покистонда бу йирик ҳайвонга қўйилган илк протез бўлиб, мазкур тажриба мамлакат ветеринария ва ҳайвонларни ҳимоя қилиш соҳаси учун муҳим қадам ҳисобланади.
Ҳозирча Кемми Карачидаги бошпанада қолган ва ҳаёти давомида шу ерда яшаши режалаштирилган. Унга доимий тиббий парвариш, ижтимоий мослашув ва жисмоний реабилитация хизматлари кўрсатилади.
Мутахассислар бу ҳолат ҳайвонларга нисбатан зўравонликка қарши курашда, шунингдек, ногирон ҳайвонларга ёрдам бериш бўйича ижобий ўзгаришлар учун туртки бўлишига умид қилишмоқда.
Изоҳ (0)