«Ал-Қоида» террорчилик гуруҳи ҳозирги вазиятда Афғонистондан ташқарида ҳужумлар уюштиришга қодир эмас. Бу ҳақда АҚШ Давлат котиби Энтони Блинкен разведка маълумотларига таяниб маълум қилди.
«Разведка ҳамжамиятининг жорий баҳосига кўра, ‘Ал-Қоида’нинг имкониятлари анча олдин шу қадар таназзулга учраганидан ҳозир у чет элда ҳужумлар уюштира олмайди», — деди Блинкен АҚШ Вакиллар палатасининг Ташқи ишлар қўмитаси тингловида. Унинг таъкидлашича, АҚШ ҳукумати бу каби таҳдидларнинг такрорланишига йўл қўймаслик учун барибир «ҳушёрликни сақлаб туради».
Блинкен Афғонистонда «Толибон» тузган ҳукумат таркибида «хизмат рўйхати жуда узун бўлган» кишилар борлигини айтди, мисол сифатида у ФҚБ томонидан қидирилаётган ички ишлар вазири Сирожиддин Ҳаққонийни келтирди. Унинг сўзларига кўра, АҚШ «Толибон» ҳукумати билан у Америка манфаатларини илгари суриш-сурмаслигидан келиб чиқиб ҳамкорлик қилади.
Давлат котиби, шунингдек, АҚШ маъмурияти Афғонистон халқига соғлиқни сақлаш ва озиқ-овқат эҳтиёжларини қондириш, шунингдек, аёллар ва болаларни ҳимоя қилиш учун 64 миллион долларлик гуманитар ёрдам беришини маълум қилди.
Бундан ташқари, Блинкеннинг айтишича, Афғонистонда ҳуқуқлари хавф остида қолган аёлларни қўллаб-қувватлашга «тўлиқ эътибор» бериш учун Давлат департаментининг юқори лавозимли амалдорини тайинлаш режалаштирилмоқда.
2001 йил 11 сентябрда «Ал-Қоида» жангарилари АҚШда қатор терактлар уюштирган. Худкуш террорчилар тўртта самолётни эгаллаб олган: улардан иккитаси Нью-Йоркдаги Жаҳон савдо маркази минораларига, яна бири Вашингтонда Пентагон биносига урилган, тўртинчи самолёт Пенсильванияда қулаб тушган. 2977 киши терактлар қурбонига айланган.
Ўшанда Афғонистонда ҳукмронлик қилаётган «Толибон» 11 сентябрь воқеаларини уюштирган «Ал-Қоида» раҳбари Усама бин Ладенни АҚШга топширишдан бош тортган. Бу эса АҚШнинг Афғонистондаги 20 йиллик урушини бошлаб берди. Кўплаб экспертларнинг фикрича, Афғонистонда «Толибон»нинг қайта ҳокимиятга кўтарилгани халқаро террорчи гуруҳларнинг жонланишига сабаб бўлиши мумкин.
Изоҳ (0)