Дунё ва ўзбек спортига оид 11 сентябрь тонгининг энг муҳим хабарлари дайжести билан танишинг.
Россиянинг Қозон шаҳрида МДҲ ўйинлари бўлиб ўтмоқда. 10 сентябрь куни ўзбекистонлик дзюдочилар жамоавий баҳсларда олтин медални қўлга киритди. Баҳслардаги иштирокини ярим финалдан бошлаган Ўзбекистон терма жамоаси мазкур босқичда Россияни 5:2 ҳисобида мағлубиятга учратди. Финалда эса Озарбайжон терма жамоаси мағлуб этилди (5:3).
12 сентябрдан 3 октябргача Литвада бўлиб ўтадиган футзал бўйича Жаҳон Чемпионати «Спорт ТВ» ва «Ёшлар» телеканаллари орқали жонли тарзда эфирга узатилади.
Эслатиб ўтамиз, Ўзбекистон терма жамоаси мусобақада B гуруҳидан жой олган бўлиб, кейинги босқичга чиқиш учун Миср, Гватемала ва Россия Футбол иттифоқи (Россия) билан куч синашади.
Ўзбекистон Суперлигасининг 17-туридан ўрин олган 3 та ўйин 10 сентябрь куни бўлиб ўтди. «Пахтакор» «Металлург» майдонига сафар қилиб, 3:0 ҳисобидаги ғалабани тантана қилди. «Бунёдкор» Тошкентда «Қўқон-1912» билан куч синашди, учрашув 2:1 ҳисобида «қалдирғочлар» фойдасига ҳал бўлди. «Навбаҳор» ва «ОКМК» Наманганда 0:0 дурангни расмийлаштирди.
Исроил Мадримов WBA чемпионлик камари учун саралаш жангида иштирок этади.
Профессионал бокснинг супер ярим ўрта вазн тоифасида (-69,8 кг) мажбурий даъвогар бўлган Мадримов (7-0, 5 КО) мазкур вазнда WBA Gold камари соҳиби Мишел Соро (35-2-1, 24 КО) билан жанг ўтказади.
Жанг элиминатор (мажбурий даъвогар) мақоми учун кечади. Жанг учун WBA ташкилоти томонидан очиқ промоутерлик аукциони эълон қилинди. Промоутерлик аукциони 20 сентябрга белгиланган.
Мадримов—Соро жанги ғолиби WBA Super камари эгаси Жермелл Чарлога қарши жанг учун мажбурий даъвогарга айланади.
1994 йили Норвегиянинг Лиллеҳаммер шаҳрида ўтказилган қишки Олимпия ўйинларида олтин медал қўлга киритган Лилия Черязовага Россиянинг Новосибирск шаҳридаги «Клешчихинский» қабристонида Ўзбекистон Миллий олимпия қўмитасининг моддий ва маънавий кўмаги билан ёдгорлик ўрнатилди, деб ёзмоқда ташкилот матбуот хизмати.
Қайд этиш ўринли, Черязова Ўзбекистоннинг қишки олимпия ўйинларидаги ягона медалчиси ҳисобланади.
Лина Черязова – 1968 йил 1 ноябрда Тошкент шаҳрида туғилган. Халқаро тоифадаги спорт устаси, Европа чемпионатининг бронза медали совриндори (1990), Жаҳон чемпиони (1993), Жаҳон Кубоги босқичлари Гран-приси совриндори (1993, 1994), Норвегиянинг Лиллахамер шаҳрида ўтказилган қишки Олимпия ўйинлари чемпиони (1994), Халқаро Олимпия қўмитаси халқаро стипендиясининг фахрий совриндори ҳисобланган. У 2019 йил 23 март санасида оғир хасталикдан вафот этган.
Криштиану Роналду «Манчестер Юнайтед»нинг «Ньюкасл»га қарши ўйинида майдонга тушади. Бу ҳақда жамоа бош мураббийи Оле-Гуннар Сульшер маълум қилди.
«Манчестер Юнайтед» – «Ньюкасл» учрашуви 11 сентябрь куни Тошкент вақти билан соат 19:00 да бошланади.
Аргентина терма жамоаси ҳужумчиси Лионель Месси Пеленинг рекордини янгилади.
Месси ЖЧ—2022 саралаш босқичи доирасида Боливияга қарши ўйинда (3:0) ҳет-трик қайд этди. Шу тариқа 34 ёшли футболчининг терма жамоадаги голлари сони 79 тага етди. Бу натижа «ПСЖ» футболчисига Жанубий Америка терма жамоалари тўпурарлари орасида биринчи ўринга чиқиб олишга имкон яратди.
Месси бу йўлда 92 ўйинда 77 та гол урган бразилиялик собиқ футболчи Пеледан ўзиб кетди. Аргентиналикнинг ҳисобида эса 153 та ўйин бор.
Жером Боатенг собиқ қайлиғига куч ишлатгани учун айбдор деб топилди ва 1,8 миллион евро жарима тўлайдиган бўлди. Бу ҳақда Bild хабар қилмоқда.
Аввалроқ Боатенгнинг 2018 йилда жанжал сабаб фарзандларининг онаси бўлган Шерин Зенлерга қўл кўтаргани ва унга тан жароҳати етказгани ҳақида хабар берилганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)