Қашқадарё вилоятида сабабсиз мактабга бормаган 51 нафар ўқувчининг ота-онаси жаримага тортилди. Бу ҳақда «Дарё»га хабар берган вилоят ИИБ ахборот хизмати раҳбари Ирода Расулованинг айтишича, ҳуқуқбузарлик Ички ишлар вазирлиги масъуллари иштирокидаги ҳуқуқбузарликлар профилактикаси кунида ўтказилган рейд тадбирларида аниқланган.
Қайд этилишича, вилоятда Ички ишлар вазирлигининг масъул мутасаддилари иштирокида ҳуқуқбузарликлар профилактикаси кунида ҳуқуқбузарларга қарши курашиш тадбири бошланган.
«Шунга асосан айни вақтда вилоятда фаолият олиб бораётган республика ишчи гуруҳи билан биргаликда воҳадаги шаҳар ва туманларда ҳуқуқни муҳофаза қилувчи ҳамда бошқа давлат идоралари ҳамкорлигида пайшанба куни ҳуқуқбузарликлар профилактикаси куни ташкил этилиб, фуқароларнинг сайёр қабуллари, суд муҳокамалари, жиноятчиликнинг олдини олиш борасида тарғибот-ташвиқот ишлари, йўл ҳаракати хавфсизлиги бўйича рейдлар, фоҳишалик, ичкиликка ружу қўйиш, гиёҳвандликни одат қилган шахслар билан профилактик суҳбатлар ўтказилмоқда», — дейди Ирода Расулова.
Масъулнинг маълумот беришича, рейднинг биринчи кунида ИИОда профилактик ҳисобда турган 1266 нафар шахс ва уларнинг оила аъзолари билан профилактик суҳбатлар ўтказилган. Давомат тадбирлари давомида сабабсиз дарсга келмаган 51 нафар ўқувчи ва уларнинг ота-оналарга нисбатан маъмурий чоралар кўрилган. Жами 8007 хонадон ўрганилиб, паспорт виза қоидаларини бузган 41 нафар шахс аниқланиб, улардан доимий ёки вақтинча яшаш тартибини бузган 13 нафарига маъмурий баённомалар тузилган.
Айтилишича, жамоат тартибини сақлаш мақсадида ташкил этилган патруллик йўналишлари томонидан 254 та ов қуроли текширилиб, 30 та объектда видеокузатув мосламалари ўрнатилган. Ҳуқуқбузарларга нисбатан маъмурий баённомалар тузилиб, қидирувда бўлган бир нафар шахс қўлга олинган.
Деҳқонобод тумани ИИБ бошлиғи ўринбосари Дилшод Мирзаевнинг маълумот беришича, туман ИИБ биносида туман ҳокими ва прокурор, шунингдек, ИИБ бошлиғи иштирокида ИИБ ходимлари ва маҳалла масъулларига «Хавфсиз ҳудуд» профилактик тадбирининг мазмун-моҳияти, тадбир доирасида қилиниши лозим бўлган ишлар ҳақида тушунтириш берилган.
«10 кун давом этадиган тадбирларнинг биринчи кунида вазирлигимиздан келган масъуллардан Фаррух Ўсаров ҳамда Музаффар Асқаровлар Деҳқонобод туманида бўлиб, тумандаги мавжуд 97 мактабда давомат тадбирларини ўтказди. Профилактика инспекторлари хизмат хоналарида бўлиб, яратилган шарт-шароитни кўздан кечирди», — дейди Дилшод Мирзаев.
Дилшод Мирзаевнинг қўшимча қилишича, Вазирлар Маҳкамаси топшириғи билан ҳар бир туманда қилинганидек, Деҳқонобод туманида ҳам 10 кишилик ҳушёрхона ташкил этилган бўлиб, туман ҳокими ва прокурор, шунингдек, Ички ишлар вазирлиги масъуллари мазкур ҳушёрхона шароитини бориб кўрган.
«Мазкур ҳушёрхона жамоат жойида маст ҳолда юрган фуқаролар учун мўлжалланган бўлиб, фуқаронинг мастлик ҳолати тарқалиб, жамиятда ўзгаларга хавф туғдирмайдиган ҳолатга келгунга қадар ушлаб туришга мўлжалланган», — дейди Дилшод Мирзаев ҳушёрхона ташкил этиш мақсади ҳақида гапирар экан.
Эслатиб ўтамиз, аввалроқ Қаршида бир гуруҳ йигитлар иштирокида оммавий жанжал юз бергани, улардан бири 19 ёшли йигитни пневматик тўппончадан яралгани ҳақида хабар берилганди.
Изоҳ (0)