Фарғона вилоятининг Сўх туманидаги мактабда директор ва ўқитувчилар ўқувчи талашиб жанжаллашган, деб хабар бермоқда «Дарё» мухбири.
Маълум қилинишича, 2021 йилнинг 9 сентябрь куни ижтимоий тармоқларда «Шармандали ҳолат: Ўзбекистон мадҳияси остида зиёли одамлар бир-бири билан жанжаллашмоқда» сарлавҳаси остида видеолавҳа тарқалган.Видеолавҳада мактаб ҳовлисида бир неча одамнинг жанжаллашаётгани, ички ишлар ходими уларни ажратишга уринаётгани ва бу ҳолатни мактаб ўқувчилари томоша қилаётгани акс этган.
«Дарё» мухбирининг аниқлик киритишича, ушбу ҳолат жорий йилнинг 6 сентябрь куни Сўх туманидаги 2-ихтисослаштирилган давлат умумтаълим мактабида ўтказилган «Биринчи қўнғироқ» тадбири вақтида юз берган.
Қайд этилишича, тумандаги "Қалъа" маҳалласи ҳудудида иккита умумтаълим муассасаси — 3-мактаб ва 2-ИДУМ жойлашган. Мазкур маҳаллада яшовчи аксарият ота-оналар фарзандлари ихтисослаштирилган мактабда таълим олишини истаган ва уларни биринчи синфга 2-ИДУМга олиб борган. 3-мактаб директори эса бу болалар ўзи раҳбарлик қилаётган мактабда ўқиши кераклигини талаб қилиб қўшни мактабга борган ва ўқувчи талашиб жанжал кўтарган.
3-мактаб директори Г.Р. 2-ИДУМ ўқитувчиларига нисбатан ҳақоратомуз сўзларни ишлатиб, уларни ўқувчилар ва ота-оналар олдида камситган, жамиятда ўрнатилган тартиб-қоидаларни қасддан менсимасдан, бақир-чақир қилиб, «Биринчи қўнғироқ» тадбирининг тартибли ўтишига тўсқинлик қилган.
Айни вақтда ҳолат юзасидан Сўх тумани ИИБ профилактика инспекторлари томонидан терговга қадар текширув ҳаракатлари олиб борилмоқда.
Изоҳ (0)