Андижон вилояти ҳокими Шуҳрат Абдураҳмонов мактаб директорлари билан учрашувда 2021/2022-ўқув йилидан бошлаб аъло баҳоларга ўқиган, ўзининг хулқи ва иқтидори билан намуна бўладиган мактаб ўқувчилар учун «Вилоят ҳокими стипендияси»ни таъсис этиш таклифини илгари сурди. Бу ҳақда «Дарё» мухбири Умиджон Мамарасулов хабар бермоқда.
Таъкидланишича, Шуҳрат Абдураҳмонов халқ таълими бошқармаси томонидан ташкил этилган «Директорлар мактаби» лойиҳаси доирасида вилоятдаги барча умумтаълим, ихтисослаштирилган мактабларнинг директорлари билан учрашув ўтказган.
Учрашув давомида 2020/2021-ўқув йилида вилоят бўйича таълим тизимида амалга оширилган ишлар таҳлил қилинган. Мактаб битирувчиларининг етти ярим минг нафарга яқини олий таълим муассасаларига киргани ва бу кўрсаткичлар ўтган йилга нисбатан ортгани қайд этилган.
Вилоят ҳокими учрашув давомида таълим ходимларининг фикр-мулоҳазаларини эшитиб, вилоятда 2021/2022-ўқув йилини «Умумтаълим мактабларида инновацион таълим, касбий маҳорат ва интеллектуал салоҳиятни ривожлантириш йили» деб эълон қилиш, ҳафтанинг жума кунини «Таълим куни» сифатида ўтказиш таклифини ўртага ташлаган. Шунингдек, ўзининг аъло баҳолари, юксак иқтидори ва қобилияти, санъат, спорт ва бошқа йўналишларда республика ва халқаро даражадаги ютуқлари билан намуна бўлоладиган мактаб ўқувчилари учун вилоят ҳокими стипендияси жорий этилишини маълум қилган. Бироқ ҳоким стипендия қай тартибда ва қанча миқдорда берилишига аниқлик киритмаган.
Изоҳ (0)