Шоу-бизнесни тарк этган «Уммон»чи Шоҳрух шоу-бизнесдан кетганлар ва Жаҳонгир Отажонов ҳақида гапираётганларга муносабат билдирди (видео)

«Уммон» гуруҳининг собиқ аъзоси Шоҳрух Исамуҳаммедов «Дарё» интернет-нашри учун эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Суҳбат давомида Шоҳрух Исамуҳаммедов собиқ шоу-бизнес вакиллари, уларнинг қайси бирига ҳавас қилиши ва Жаҳонгир Отажоновга салбий фикр билдираётган одамлар ҳақида гапирди.

Шоу-бизнесдан биринчи кетган инсонлардан Дониёр Тошмуҳаммедов исмли хонанда бўлар эди. Улар ҳам айни чўққига чиққан вақтларида кетганлар. Ҳозир улар қори бўлганлар. Жуда ҳавас қиламан. Бу ҳақиқий Аллоҳ буюрган яхши йўл, Аллоҳ берган истеъдодни тўғри йўлда ишлатяптилар.

Фарруҳ Соиповга ҳам ҳавас қиламан. Улар ижтимоий тармоқларда ҳам йўқлар.

Сардор Раҳимхон ўзимнинг қадрдон акам. Қилаётган ишлари жуда ҳам чиройли ишлар деб ўйлайман. Бу ишлар ҳам санъатнинг бир бўлаги, бу ҳам бир ижод деб биламан. Мана ҳозир одамлар учун Бўка туманида уй қурулишига бош бўлмоқдалар. Аллоҳ хайрли қилсин, илоҳим.

Тўғриси Жаҳонгир Отажоновга тушунмадим. Ака билан ҳаётда гаплашган бўлсангиз, улар яхши одамлар. Гап-сўзлари жойида. Кўпчилик Жаҳонгир Отажоновни менга гапирди, улар ҳақида муносабатимни сўрашди. Мен у одам билан гаплашмасдан, улар ҳақида фикр билдира олмайман, чунки эртага ундан ёмони менга келиб қолиши мумкин. Ҳадисда «бир одамни устидан кулсангиз, ундан ёмон ҳолатга тушмагунингизча ўлмайсиз», дейилган. Шу сабабли бирор одамни ёмонлашдан аввал у инсон билан гаплашиб, кейин бирор фикр билдирсам тўғри бўлади. Ҳаммамизни тўғри йўлдан адаштирмасин, илоҳим.

Шоҳрух Исамуҳаммедов, тадбиркор, «Уммон» гуруҳининг собиқ аъзоси