Continental kompaniyasi Myunxen avtosaloni doirasida qisman organik moddalardan ishlangan Conti GreenConcept shinalarini taqdim etdi. Mazkur shinalar momaqaymoq, guruch po‘stlog‘i, shuningdek, o‘simlik yog‘i va qatronidan ishlangan. Kompaniya bu kabi texnologiyani 2022-yildan joriy etishni rejalashtirmoqda, deb xabar beradi Motor.
Conti GreenConcept shinalarining 35 foizi qayta tiklanadigan xomashyolardan iborat: bu momaqaymoqlar kauchugi, guruch po‘stlog‘idan olingan silikatlar, shuningdek, turli o‘simlik moylari va qatronlar. Yana 17 foizi ikkilamchi mahsulotlar hisoblanadi — jumladan, 60 ga yaqin plastik idishni qayta ishlash orqali olingan texnik uglerod va poliester. Poliesterdan Continental tarixda birinchi bor radial karkas yasagan.
Tajriba shinasining og‘irligi 7,5 kilogrammni tashkil etadi — bu oddiy shinadan 40 foiz yengil demak. Kompaniyaning baholashicha, tebranish qarshiligi shu kabi sinfga kiradigan ommaviy shinalarnikidan 25 foizga pastroq. Bu esa tabiiyki Conti GreenConcept shinalari “kiygizilgan” avtomobil kamroq energiya sarflashidan dalolat beradi: elektromobil holatida energiya zaxirasi 6 foizga ortadi.
Bundan tashqari, o‘ziga xos tarkibi sabab shina prototipi protektorni bir necha bor almashtirish imkonini beradi, bu esa o‘z navbatida “pokrishka”ning qolgan komponentlarini xizmat qilish muddatini oshiradi, ekologiyaga salbiy ta’sirini kamaytiradi.
Continental 2022-yildan boshlab ContiRe.Tex texnologiyasini ommaviy joriy etishni rejalashtirmoqda. 2050-yilga borib esa mutaxassislar to‘liq ekologik avtomobil shinalarini ishlab chiqarishga o‘tmoqchi.
Izoh (0)