Сурхондарё вилояти аҳолисини тоза ичимлик суви билан таминлайдиган йирик лойиҳани бошлашга старт берилди. Бу ҳақда 6 сентябрь куни вилоят ҳокимлиги матбуот хизмати хабар берди.
Қайд этилишича, бугунги кунда Сурхондарё вилояти аҳолисининг 44,6 фоизи марказлашган ичимлик суви билан таъминланмаган. 218 та сув иншооти ва 3 минг километрдан зиёд тармоқлар таъмирга муҳтож. Вилоятнинг жанубий туманлари ва Термиз шаҳрида сув минерализацияси миқдори ошган.
Шу боис Президент Шавкат Мирзиёев жорий йилнинг 1—2 июнь кунлари вилоятга ташрифи чоғида Тўпаланг сув омборидан ичимлик суви тармоғи тортиш бўйича кўрсатма берган эди. Шунга мувофиқ дастлабки лойиҳа ишлаб чиқилди.
Лойиҳага кўра, Тўпаланг сув омборининг қуйи қисмида босимни сўндириш, сувни тозалаш ва тарқатиш иншоотлари қурилади. У ердан туманлардаги сув тақсимлаш узелларигача жами 361 километр қувур тортилади. Бу тизим самарасида Сариосиё, Денов, Шўрчи, Қумқўрғон, Жарқўрғон, Бандихон, Қизириқ, Шеробод, Ангор, Музработ, Термиз туманлари ва Термиз шаҳридаги 1,7 миллион аҳолининг сув таъминоти яхшиланади.
Лойиҳанинг умумий қиймати 138 миллион доллар бўлиши ҳисоб-китоб қилинган. У маҳаллий To‘palang HPD Platinum корхонаси томонидан 2021—2023 йиллар давомида босқичма-босқич ишга туширилади (дастлабки маълумотларда 2024 йилда ишга туширилиши айтилганди).
Вилоят ҳокимлигида ўтказилган видеоселектор йиғилишдан сўнг бош вазир биринчи ўринбосари Очилбой Раматов, Сурхондарё вилояти ҳокими Тўра Боболов, сенатор Абдуғани Сангинов Сариосиё туманида бўлиб, қурилиш ишларини бошлаб берди.
Сариосиё, Қумқўрғон ва Шеробод туманларида ташкил этилган қурилиш штабида давлат ва жамоат ташкилотлари раҳбарлари, мутахассислар, қурувчилар ва кенг жамоатчилик вакиллари иштирокида лойиҳанинг тақдимотлари ўтказилди.
Очиқ маълумотларга кўра, To‘palang HPD Platinum МЧЖнинг ягона таъсисчиси To‘palang HPD Holding МЧЖ ҳисобланади. Мазкур МЧЖ улушининг катта қисми — 61,70 фоиз қисми Абдураҳмонов Ислом Абдуғаниевичга тегишли. У, Telegram’даги «Давлетовуз» канали маълумотларига кўра, «Ўзбекгидроэнерго» акциядорлик жамияти бошқаруви раиси, сенатор Сангинов Абдуғани Абдураҳмоновичга яқин қариндош бўлади.
«Gazeta.uz» маълумотларига кўра, To‘palang HPD Holding Президентнинг 2003 йил 24 январдаги фармони талаблари асосида «Тўпаланг сув омбори ва ГЭС қурилиш»нинг «ТўпалангсувГЭСқурилиш» МЧЖ этиб қайта ташкил этилиши натижасида вужудга келган, 2017 йил декабрида яна қайта ташкил этилган. Унинг асосий фаолият турлари ГЭС, сув хўжалиги иншоотлари, гидроузеллар қуриш, канал ҳамда дренажлар қазиш ва бошқаларда қурилиш-монтаж ишларини амалга оширишдан иборат.
Хабарда мазкур лойиҳани бажарувчи тендер ёки бошқа тартибда танлаб олингани ҳақида маълумот келтирилмаган.
Эслатиб ўтамиз, шу йилнинг 10 май куни Олий суднинг Жиноят ишлари бўйича судлов ҳайъатида «Сардоба» сув омборидаги офат бўйича ўқилган суд ҳукмида ҳолдинг таркибига кирувчи To‘palang HDP Irrigation Systems МЧЖ раҳбари лавозимида ишлаган Б. Асадовга ўташ учун узил-кесил 4 йил муддатга озодликдан маҳрум қилиш ва базавий ҳисоблаш миқдорининг 600 баравари миқдорида 133 800 000 сўм жарима жазолари тайинланган эди.
Изоҳ (0)