Бразилияда бир гуруҳ сиёсатчи ва жамоат арбоблари тарқатган баёнотга кўра, мамлакат президенти Жаир Болсонару давлат тўнтариши тайёрлаётган бўлиши мумкин. Бу ҳақда Daily Mail хабар берди.

Фото: Reuters

Собиқ президентлар, бош вазирлар ва сиёсатчилардан ташкил топган нуфузли гуруҳ томонидан ёзилган хатда Болсонару тарафдорларининг 7 сентябрга режалаштирилган митинглари ҳарбий тўнтариш экани таъкидланган.

Мактубни имзолаганлар орасида Испания собиқ бош вазири Хосе Луис Родригес Сапатеро, Греция собиқ молия вазири Янис Варуфакис, Парагвай собиқ президенти Фернандо Луго, Британиянинг Лейбористлар партияси собиқ раҳбари Жереми Корбин ва бошқалар бор.

Имзо эгаларининг таъкидлашича, Бразилиядаги вазият январь ойида Вашингтонда Капитолийнинг қўлга олиниши билан ўхшаш. Сиёсатчилар даъво қилишича, Болсонару тарафдорларининг Олий судга ҳамда «оқ танлилар тарафдорлари», ҳарбий полиция ва ҳукумат амалдорлари иштирокидаги Конгресс сиёсатига қарши умуммиллий маршлари «дунёдаги учинчи энг йирик демократия тўнтаришига уриниш» гумонини келтириб чиқаради.

«Биз Бразилиянинг демократик институтларига яқинлашиб келаётган таҳдиддан жиддий хавотирдамиз, уларни 7 сентябргача ва ундан кейин ҳам ҳимоя қилишга шаймиз. Бразилия халқи демократияни ҳарбий бошқарувдан ҳимоя қилиш учун ўнлаб йиллар курашди. Энди Болсонарунинг буни тортиб олишига рухсат бериб бўлмайди», — дея таъкидлаган сиёсатчилар.

Улар, шунингдек, 10 август куни Болсонару Бразилия пойтахтида «мисли кўрилмаган ҳарбий парад» ўтказганини эслатди. Бу президентнинг Конгрессдаги маслакдошлари томонидан парламентда овоз бериш тизимини ислоҳ қилиш тўғрисидаги қонун лойиҳасини қабул қилдиришга уринишлар фонида бўлиб ўтди.

Президентнинг ўзи 21 август куни унинг тарафдорлари томонидан ўтказилган митинглар Конгресс ва Олий судга қарши «зарурий қарши ҳужумга» тайёргарлик эканини айтган. Болсонару, шунингдек, ҳам пойтахт Бразилиядаги, ҳам иқтисодий пойтахт Сан-Паулудаги митингларда қатнашишни режалаштирмоқда.

Иккинчи муддатга сайланишга қарор қилган Бразилия президенти Жаир Болсонару мамлакатдаги электрон овоз бериш тизими манипуляцияга мойиллигини бир неча бор таъкидлаган ва қоғозда овоз беришни таклиф қилган.

Бироқ бу овоз бериш тизимини ўзгартиришни кўзда тутиши сабабли, Бразилия Конгресси (парламенти) қуйи палатаси президент таклиф қилган конституциявий тузатишни рад этди.

Болсонару 2022 йилда бўлажак президент сайловлари натижалари сохталаштирилган тақдирда давлат раҳбари лавозимидан воз кечмаслигини эълон қилганидан кейин Бразилия Олий сайлов суди тергов очишга қарор қилди.