Оққўрғондаги боғчада болалар заҳарланиб, шифохонага ётқизилгани, ҳолат юзасидан жиноят иши қўзғатилгани ҳақида хабар берилган эди. Тошкент вилояти ИИББ ҳолат юзасидан қўшимча маълумотлар тақдим этди.
Унда айтилишича, 10 август куни, соат 14:00 ларда Оққўрғон тумани ИИБ навбатчилик қисмига тумандаги 5-сонли мактабгача таълим ташкилотининг тарбияланувчилари ботулизм касаллиги ташхиси билан шифохонага мурожаат қилгани юзасидан хабар келиб тушган.
Шундан сўнг Оққўрғон тумани прокуратураси томонидан 11 август куни мазкур ҳолат юзасидан жиноят иши қўзғатилган. Жиноят иши кейинчалик Тошкент вилояти ИИББ ҳузуридаги Тергов бошқармаси иш юритувига олиниб, махсус тузилган тергов гуруҳи терговчиларига топширилган.
Ҳолатга ҳар томонлама, тўлиқ ойдинлик киритиш мақсадида «Ўзстандарт» агентлиги ва вилоят Санитария эпидемиология осойишталиги маркази ходимлари мутахассис сифатида ишга жалб этилиб, улар иштирокида мазкур МТТда мавжуд бўлган барча турдаги озиқ-овқатлар (пишлоқ, тухум, томат, сут ва сут маҳсулотлари, консерваланган мевали мураббо ва бошқалар)дан намуналар олинган.
Шунингдек, тергов давомида судга оид тиббий, судга оид кимёвий ва бошқа бир қатор экспертизалар тайинланган. Шу билан бирга, Хадича Сулаймонова номидаги Республика суд экспертиза марказига судга оид комплекс экспертизалар тайинланган. Экспертизалар лаборатория шароитида ўрганилиши ва чуқур тадқиқот талаб этиши сабабли ҳозирда экспертлар томонидан ўрганиш ишлари давом эттирилмоқда.
«ИИББ ҳузуридаги Тергов бошқармаси томонидан бугунги кунга қадар заҳарланиш ташхиси қўйилган болалар ва уларнинг ота-оналари, таълим муассасасининг барча ходимлари, жами 100 дан ортиқ шахслар жиноят иши юзасидан батафсил сўроқ қилинди. Ушбу жиноят ишининг тергови Ўзбекистон Республикаси бош прокурори томонидан алоҳида назоратга олинган.
Терговга жалб қилинганларнинг дахлсизлик ҳуқуқларини таъминлаш ва тергов иши давомида ҳақиқатни аниқлашга тўсқинлик қилиш ҳолатларининг олдини олиш мақсадида бошқа маълумотлар ошкор қилинмайди», — дейилади вилоят ИИББ хабарида.
Шунингдек, тайинланган экспертизаларнинг якуний хулосалари ва жиноят иши юзасидан тўпланган ҳужжатларга асосан қонуний қарор қабул қилиниб, ОАВ орқали қўшимча маълумот берилиши билдирилган.
Изоҳ (0)