Европада 31 август, сешанба куни 2021 йилги ёзги трансфер ойнаси ёпилди. «Дарё» дедлайн кунининг сўнгги соатларида амалга оширилган трансферларини ушбу саҳифа орқали ёритиб борди.

Фото: Twitter

«Манчестер Юнайтед» Криштиану Роналду трансферини расман эълон қилди. «Ювентус» ҳам ҳужумчининг инглиз клуби билан шартнома имзоланганини тасдиқлади.

36 ёшли португалиялик «қизил иблислар» билан икки йиллик шартнома имзолади. Шунингдек, битимга уни яна бир йилга узайтириш банди киритилган.

Фото: «Манчестер Юнайтед»

Аввалроқ «Манчестер Юнайтед» Роналду трансфери учун Турин клубига 15 миллион евро тўлаши ва бу сумма 5 йил ичида тўлаб бўлиниши ҳақида хабар берилганди. Бундан ташқари, 8 миллион евро миқдорида бонуслар ҳам кўзда тутилган.

«Арсенал» Виллиан билан ўзаро келишув асосида шартномани бекор қилди. Бразилиялик футболчи «Коринтианс» клубига ўтади.

Трой Дин 11 йиллик фаолиятидан сўнг «Уотфорд»ни тарк этди. У Чемпионшип вакили «Бирменгем» билан икки йиллик шартнома имзолади.

Фото: «Ювентус»

Мойзи Кин «Ювентус»га қайтди. Турин клуби Кинни 2023 йилгача ижарага олган. Кин икки йил олдин «Ювентус»дан «Эвертон»га ўтганди. Футболчи ўтган мавсумни «ПСЖ» сафида ижарада ўтказди.

«ЦСКА» ярим ҳимоячиси Никола Влашич фаолиятини Англия чемпионатида давом эттиради. «Вест Ҳэм» 23 ёшли хорватиялик футболчи билан 5 йилга мўлжалланган шартнома имзолади.

«Брайтон» «Хетафе» ярим ҳимоячиси Марк Кукурельяни ўз сафига қўшиб олганини эълон қилди. Инглиз клуби 23 ёшли испаниялик билан 5 йиллик шартнома имзолаган.

«Аталанта» «АЗ Алкмар» ярим ҳимоячиси Тён Копмейнерсни сотиб олди. 23 ёшли Копмейнерс Нидерландия терма жамоаси аъзоси ҳисобланади.

«Челси» Дэнни Дринкуотерни Чемпионшип вакилига ижарага бериб юборди. Ярим ҳимоячи «Рединг» сафида камида бир мавсум давомида ҳаракат қилади.

Фото: Twitter

«Реал» Эдуардо Камавингани ўз сафига қўшиб олди, деб ёзмоқда таниқли журналист ва инсайдер Фабрисио Романо. Романога кўра, «Ренн» ва «Реал» 18 ёшли футболчининг трансфери борасида келишувга эришган ва футболчи «қироллик клуби» билан шартномага ҳам имзо чеккан. Мадрид клуби ҳам ушбу трансферни расман эълон қилди. Томонлар 2027 йилгача шартнома имзолаган.

Мадридликлар франциялик ёш иқтидор эгаси учун 31 миллион евро сарфлагани айтилмоқда.

«Вольфсбург» ва Хорватия терма жамоаси ҳимоячиси Марин Понграчич фаолиятини «Боруссия Д» клубида давом эттиради. «Арилар» 23 ёшли футболчини ижарага олган.

Фото: «Торино»

«Лестер» ярим ҳимоячиси Деннис Прат фаолиятини Италия чемпионатида давом эттиради. 27 ёшли ярим ҳимоячи «Торино»га ижарага берилди. Шартномада футболчини сотиб олиш банди мавжуд.

Фото: «Лейпциг ФК»

«Барселона» ярим ҳимоячиси Илайш Мориба «Лейпциг» футболчисига айланди. Немис клуби 18 ёшли футболчига 16 миллион евро ва қўшимча 6 миллион евро бонус тўлаган. Бундан ташқари, «Барселона» футболчининг кейинги сотувидан ҳам 10 фоиз улуш олади.

«Арсенал» ярим ҳимоячиси Рис Нелсон фаолиятини Нидерландия чемпионатида давом эттиради. «Фейеноорд» 21 ёшли футболчини бир мавсумга ижарага олган.

Фото: Twitter

«Манчестер Юнайтед» Дэниэл Жеймсни «Лидс»га сотиб юборди. Уэльслик футболчи «Лидс» билан 2026 йилгача мўлжалланган шартнома имзолади.

«Ювентус» ПСВ ярим ҳимоячиси Муҳаммад Иҳаттарен билан шартнома имзоланганини эълон қилди. Футболчи катта эҳтимол билан «Сампдория»га ижарага берилади.

Фото: «Атлетико М»

Антуан Гризманн «Атлетико М»га қайтди. Мадрид клуби уни «Барселона»дан бир йилга ижарага олди. «Атлетико М» Гризманн ижараси учун 10 миллион евро тўлайди. Футболчини сотиб олиш эса 40 миллион еврога тушади.

Фото: «Атлетико М»

Сауль Нигес фаолиятини «Челси»да давом эттиради. Мадрид клуби футболчини «аристократлар»га ижарага берган. Саулнинг бир йиллик ижараси 4 миллион еврони ташкил қилади. Шунингдек, 35 миллион еврога сотиб олиш ҳуқуқи ҳам кўзда тутилган.

Хосе Саломон Рондон эркин агент сифатида «Эвертон» билан «2+1» кўринишида шартнома имзолади.

«Арсенал» «Болонья»дан Такехиро Томиясуни сотиб олди. Трансфер суммаси 18 миллион еврога баҳоланмоқда.

22 ёшли футболчи «канонирлар» билан узоқ муддатли шартнома имзолаган.

Фото: «Арсенал»

«Арсенал» Эктор Бельеринни «Бетис»га ижарага берди. Ижара муддати бир йилга мўлжалланган.

«Барселона» Эмерсон Роялни «Тоттенҳэм»га трансфер қилди. «Шпорлар» 22 ёшли бразилиялик футболчи учун «Барселона»га 25 миллион евро берган.

Фото: «ПСЖ»

«ПСЖ» «Спортинг» ҳимоячиси Нуну Мендешни сотиб олиш ҳуқуқи билан ижарага олди. Ижара муддати якунлангач, парижликлар Португалия жамоасига 40 миллион евро тўлайди ва Мендеш билан 5 йиллик шартнома имзолайди.

«Тоттенҳэм» Серж Орье билан шартномани бекор қилди.

ПСВ «Бенфика» ҳужумчиси Карлос Винисиусни икки йилга ижарага олди.

Фото: «ПСЖ»

«Спортинг» «ПСЖ» ярим ҳимоячиси Пабло Сарабияни мавсум охиригача ижарага олди.

«Лестер» «Лейпциг» ҳужумчиси Адемола Лукманни мавсум охирига қадар ижарага олди. Лукман ўтган мавсумни «Фулҳэм» сафида ижарада ўтказганди.

Кейта Бальде «Монако»ни тарк этиб, эркин агент сифатида «Кальяри» сафига қўшилди.

Фото: «Барселона»

«Барселона» «Севилья» ҳужумчиси Люк де Йонгни ўз сафига қўшиб олганини эълон қилди. Де Йонг 2022 йилнинг 30 июнига қадар каталон клубида ижарада бўлади.

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!