Ўйинларни сотиш, терма жамоадаги маоши ва чет элдан тушган таклиф ҳақида. Вадим Абрамов билан интервью

Ўзбекистон терма жамоаси собиқ бош мураббийи Вадим Абрамов YouTube’даги Alter Ego лойиҳасига берган интервью берди. Қуйида Абрамовнинг ўйинларни сотиш, терма жамоадаги маоши ва тотализатор ҳақидаги фикрлари тақдим этилади.

Ўйинларни сотиш ҳақида

Мен ўйинларни сотиш бўйича чемпионман? Бундай деётганлар менинг статистикамни олиб қарасин: нечта ўйин ютқазганман ва кимга сотганман. Мисол учун, Олимпия терма жамоасининг БААга қарши ўйинини олайлик, менгача ҳеч қайси мураббий ҳал қилувчи босқичгача етиб бормаган. Мен икки марта бошқарган ва икки марта ҳал қилувчи босқичгача борганман. Ўша ўйинда бизни Олимпиададан ярим соат ажратиб турганди. Қайси аҳмоқ бундай вазиятда ўйинни сотади, улар нима ҳақида гапирмоқда ўзи?

Футболчилар сотади ўйинни, мураббий эмас. Биласизми, қандай қилиб? Мен ҳам сотишим мумкин, ҳар қандай мураббий каби, бунда муаммо йўқ. Фақат буни амалга ошириш учун футболчиларга айтиш керак. Ўйинчилар эса тирик, улардан сўраса бўлади, детектор ҳам ишлатиш мумкин, бунинг ҳеч қандай қийин жойи йўқ. Вақт ўтгандан кейин барибир ҳаммаси чиқиб келади. Улар шундай ўйлашни хоҳласа, ўйлайверсин. Ютқаза олмаслигимдан фахрланаман, битта-иккита ўйинни ютқазаман, мени ишдан олиб ташлашади. Мендан олдин ўша босқичларга яқин ҳам келмаган одамлар эса ишлайверган ва ишлашда давом этмоқда.

2011 йилги Осиё Чемпионати ҳақида

Мусобақага яхши тайёргарлик кўргандик, Европа жамоалари билан ўйинлар ўтказгандик. Ўшанда устимиздан кулишганди ҳам, Албания терма жамоаси билан ўйнаганимизда бир тоифа журналистлар ҳар хил гапларни ёзганди ва албанларнинг кучига жуда паст баҳо берганди. Уларни тушунаман, уларнинг мақсади бор, майли ўз ишлари билан шуғулланаверсин, балки улар шу тариқа ўзбек футболига ёрдам берар. Лекин ўша Албания кейин Англияни ҳам ютган. Биз катта ишни амалга оширгандик ва яхши таркиб йиғилганди.

Австралияга қарши ўйин ҳақида

Бу футбол. Айтиш мумкинки, бахтсиз ҳодиса. Биринчи голгача ҳаммаси яхши кетаётганди. Кейин иккинчи гол ва қизил карточка. Шундан сўнг бу ўйинда ғалаба қозона олмаслигимизни тушундим ва ёшларга имкон беришга қарор қилдим. Улар эса гол уришни хоҳлади ва олдинга югуриб кетишни бошлади. Қарши ҳужумларда жазоланавердик. Шунақаси ҳам бўлиб туради. Нафақат мен, етук мураббийларда ҳам шундай бўлиб туради. 6 марта 1:0 га ютқазгандан кўра бир марта 6:0 га ютқазган яхши.

Терма жамоадаги маоши ҳақида

Ойига 250 миллион олганманми? Сизга шундай жавоб бераман: 2011 йилда ойлигим бир миллион икки юз минг сўм бўлган. Ўшанда бу нарса кимнидир қизиқтирганми? Терма жамоада ҳам, «Бунёдкор»да ҳам маошим мендан олдингилардан кам бўлган. Буни улар ҳам билади. Бу маълумотни атайлаб чиқариб юборишган. Унда Эктор Купернинг ҳам ойлигини айтишсин. Ва олдинги мураббийларникини ҳам. Уларнинг ҳам, менинг ҳам маошимни айтишсин, шунда адолатдан бўлади.

Тотализатор ҳақида

Ғарбда бу бизнес ва ҳамма худди бошқа ўйинлар каби буни ўйнайди. Мен ҳам бир вақтлар ўйнаганман, хўш, нима қилибди? Чунки Тошкентда ўйнайдиган жой бор эди. 2008 йилдан бери ўйнамайман. Футболни тушунганим учун жонли эфирда пул тикканман ва ютганман, нормал ҳолат. Шу ердан мен ҳақимда «тотализаторчи» деган гап чиққан бўлса керак. Ўйнашни тўхтатганимга сабаб, бундай жойларнинг ёпилгани бўлган. Ишонасизми, йўқми, телефонда умуман ўйнамаганман. Бундай сайтларни қандай ишлатишни ҳам билмайман.

Азиз Ҳайдаров билан саралаш босқичидаги келишмовчилик бўлгани ҳақида

Азиз Ҳайдаров вақт ўтганидан кейин нима қилиб қўйганини тушуниб етади. Унинг нима қилгани ҳақида эса гапиришни истамайман. У ёш йигит, ўйлашимча, унга ҳаётий тажриба етишмади, вазиятни ва ким кимлигини тўғри баҳолай олмади. Терма жамоага келишимнинг ташаббускори ким бўлганини билмайман, лекин у охирги вақтда терма жамоага ва менга нисбатан ўзини яхши тутмади.

Ҳозир нима билан шуғулланаётгани ҳақида

Хориждан таклиф бўлди, бироқ рад этдим. Таваккал қилмасликка қарор қилдим. Чемпионат давом этаётган вақтда жамоани қабул қилмадим. Мавсумга тайёрламаган жамоангиз билан натижа кўрсатиш қийин. Бошқа давлат, бошқа менталитет. Ниманидир исботлайдиган ёшдан ўтганман. Шунчаки вақтни исроф қилиш бўлади.

Шунча футболчини етиштирдим. Олдинлари совет даврида терма жамоага бир футболчини етиштириб бергани учун хизмат кўрсатган мураббий унвони бериларди. Мен қанча футболчи тарбиялаганимни ва терма жамоа даражасига олиб чиққанимни биласизми? Бу ҳақда статистика борми? Йўқ. Лекин тотализатор ва келишилган ўйинлар ҳақида гапирасиз. Бу футболчилар ҳақида эса ҳеч ким ҳеч нима демайди. Алам қилади, афсус. Ҳар хил сафсаталарни эшитиш кулгили, лекин яхши нарсалар ҳақида ҳеч ким ёзмайди ҳам, гапирмайди ҳам. Чунки бу ҳеч кимга қизиқ эмас.

Вадим Абрамов, футбол мураббийи