Элдор Шомуродовнинг «Рома»га трансфери қидирувда бўлган польшалик қизалоқнинг топилишига ёрдам берди

Элдор Шомуродов нафақат майдонда, балки унинг ташқарисида ҳам «Рома» учун фойдали трансфер бўлди.

Ўзбекистонлик футболчининг трансфери эълон қилиниши польшалик йўқолган қизчанинг топилишига сабаб бўлди. Гап шундаки, «Рома» 2019 йилдан буён янги харидни эълон қилганда футболчилар таништириладиган видеога қидирувда бўлган болаларнинг суратини жойлаштиради. Агар расмдаги болалар кимгадир таниш бўлса, видеода жойлаштирилган тегишли ташкилотлар рақамларига қўнғироқ қилиш мумкин.

Бу ғоя иш бериб келмоқда. «Рома» Буюк Британия, Италия, Греция, Бельгия, Кения ва энди Польшада йўқолиб қолган 12 нафар боланинг топилишига ёрдам берди.

Элдор бундан хурсанд: «Йўқолган қизчанинг топилиб, оиласининг ташвиши камайганидан хурсандман. Футболнинг машҳурлигидан мана шу тарзда фойдаланадиган клубнинг аъзоси эканлигимдан фахрланаман».

Бу лойиҳани бутун «Рома» жамоаси қўллаб-қувватлайди. Клуб 12 нафар болакайнинг топишилига ўз ҳиссасини қўшганидан фахрланади. Албатта, асосий ишни биз ҳамкорлик қиладиган ташкилотлар бажаради. Улар ҳар сафар бизга яна бир болакай топилгани ҳақида хабар берганда, бошимиз осмонга етади.

Макс ван ден Дул, «Рома»нинг маркетинг бўйича директори