“Tolibon” harakati Panjsher viloyatidagi avanportga hujum qildi. Bu haqda “Tolibon”ga qarshilik kuchlari yetakchisi kichik Ahmad Mas’udga yaqin manbasiga tayanib, TOLO News xabar bergan.
Agentlik manbasiga ko‘ra, qarshilik kuchlari hujumni qaytara olgan. Ayni paytda “Tolibon” va qarshilik kuchlari o‘rtasidagi janglar davom etmoqda.
“TASS”ning viloyatdagi manbasi ma’lum qilishicha, hujum hududning g‘arbiy qismida yuz bergan. Uning aytishicha, “Tolibon” a’zolari orasida halok bo‘lganlar va yaralanganlar bor.
Ba’zi OAVlarga ko‘ra, o‘tgan tunda AQSh Afg‘onistondan o‘z qo‘shinlarini olib ketishni yakunlashi fonida “Tolibon” Panjsher vodiysiga ikkita yo‘nalishda: Bag‘lon viloyatidagi Andarab vodiysi tomonidan hamda Jabal-us-Siroj shahri tomonidan hujum qilgan.
“Tolibon” Andarab yo‘nalishidagi janglarda 85 askarini yo‘qotgan, 108 nafari yaralangan. Jabal-us-Siroj yaqinidagi to‘qnashuvlarda esa 12 jangari halok bo‘lib, 26 kishi jarohatlangan.
Panjsher himoyachilari orasida ham yaradorlar borligi ma’lum qilinmoqda.
“Tolibon” harakati bu ma’lumotni izohlaganicha yo‘q.
AQSh va ittifoqdoshlari o‘z qo‘shinlarini olib ketishni boshlaganidan keyin “Tolibon” hujumga o‘tishni boshlagandi. Ular yirik shaharlarni birin-ketin egallab, 15-avgust kuni Kobulga yetib keldi. Panjsher hozirgacha jangarilar nazorati ostiga o‘tmagan yagona viloyat bo‘lib qolmoqda. U yerda o‘zini davlat rahbari deb e’lon qilgan vitse-prezident Amrulla Solih ham joylashib olgan.
22-avgust kuni jangarilar panjsherliklarga ultimatum e’lon qilib, to‘rt soat ichida taslim bo‘lishni talab qildi. Mas’ud Panjsher yetakchilari viloyatni topshirib qo‘ymasligini bildirdi. Keyinroq “Tolibon” hududga yuzlab jangchilarni yuborganini ma’lum qilib, viloyatni qamal qilishni boshladi. Jangarilar Panjsher aholisini internetdan uzib qo‘ydi, hududda mobil aloqa ishlashdan to‘xtadi.
Mas’ud voqealar rivoji tinch bo‘lishiga umid bildirdi, ammo “harbiy variant”ni ham istisno qilmadi va qarshilik kuchlari ehtimoliy hujumlarni qaytarishga tayyorlanayotganini qayd etdi.
Izoh (0)