Шимолий Корея Ёнбен уездидаги плутоний ишлаб чиқариш реакторини қайта ишга туширган бўлиши мумкин. Бу ҳақда Атом энергияси бўйича халқаро агентлик (IAEA)нинг йиллик ҳисоботига асосланиб, The Wall Street Journal хабар берди. Реакторни қайта ишга тушириш мамлакатга ядро қуроллари арсеналини кенгайтиришга ёрдам бериши мумкин.
«Июль ойининг бошидан бери реакторнинг ишга тушганидан далолат берувчи аломатлар, жумладан, совитувчи суюқликнинг оқизиб юборилиши кузатилди», — дейилади ҳисоботда.
Муаллифларнинг таъкидлашича, реактор 2018 йилнинг декабридан 2021 йилнинг июлигача ҳаракатсиз бўлган.
Бунга параллел равишда, КХДР реакторда аввал ишлатилиб, сўнг чиқариб ташланган ёқилғидан плутонийни ажратиб олиш учун реактор ёнидаги лабораториядан фойдаланмоқда. Бундай тадбирлар Шимолий Кореяга янги ядровий қурол ишлаб чиқаришга ёрдам бериши мумкин, дейди экспертлар.
Ҳисоботда агентлик ушбу ҳодисалардан хавотир билдирган ва уларни БМТ Хавфсизлик кенгаши қарорларини бузиш деб атаган.
Шимолий Корея етакчиси Ким Чен Ин 2018 йилнинг сентябрида Ёнбендаги ядровий реакторни ёпишга ваъда берганди. Бунгача реактор бир неча бор тўхтатилиб, қайта ишга туширилган. Охирги марта Шимолий Корея ҳукумати уни 2013 йилда ишга туширган. Реактор 5 МВт қувватга эга, унинг ёрдамида уранни ядровий каллакларни яратишга имкон берадиган даражада бойитиш мумкин.
Изоҳ (0)