Тожикистонда 16 минг кишига амнистия эълон қилинади

30 август куни Тожикистон президенти Эмомали Раҳмон республика Олий Мажлисининг Вакиллар палатаси (парламент қуйи палатаси)га “Амнистия тўғрисида”ги қонун лойиҳасини кўриб чиқиш учун юборди. Бу ҳақда Асиа-Плус хабар берди.

Шу муносабат билан, Тожикистон президенти 6-сентябрь куни мамлакат парламент қуйи палатасининг навбатдан ташқари сессиясини чақиради.

Дастлабки маълумотларга кўра, янги амнистия қонуни 16 минг кишини қамраб олади, шундан 10 700 киши жиноий жавобгарликдан ва жазо ўташни давом эттиришдан озод қилинади. Жумладан, 800 нафар гумонланувчи ва айбланувчи, 350 нафар судланувчи, ахлоқ тузатиш муассасаларидан 3 мингга яқин, аҳоли пунктларидаги колониялардан 1900 ва ахлоқ тузатиш ишлари инспекциясидан 4650 маҳкум озод қилинмоқда. 5300 нафар маҳкумнинг жазо муддати қисқартирилади.

Қонун лойиҳаси қуйидаги шахсларни жиноий жавобгарликдан ва жазони ўташдан бутунлай озод қилади: эҳтиётсизлик оқибатида жиноят содир этган; жазони ижро этиш тўхтатилган; жазо шартли қўлланилмасдан, ахлоқ тузатиш колонияси турар жойида жазо ўтаётган; шартли равишда муддатидан олдин озод қилинган; озодликдан маҳрум қилиш билан боғлиқ бўлмаган бошқа жазога ҳукм қилинган; иқтисодий хусусиятга эга жиноятлар учун ҳукм қилинган ва етказилган моддий зарарни тўлиқ қоплаган шахслар.

Қонун лойиҳасида аёллар, вояга етмаганлар, 55 ёшдан ошган шахслар, ногиронлар, оғир касаллар, давлат мукофотларига эга бўлган кишилар, уруш қатнашчилари ва уларга тенглаштирилган шахслар, шунингдек чет эл фуқаролари биринчи ўринга қўйилган.

Агар юқоридагилар содир этган жиноятлар “Амнистия тўғрисида”ги қонун томонидан чекланган жиноятларга тааллуқли бўлмаса, улар жиноий жавобгарликдан ва жазони ўташдан озод қилинади.

Ўзбекистонда Шавкат Мирзиёев 27 август куни “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги фармонни имзолади. Фармон Мустақиллик байрами арафасида давлат томонидан олиб борилаётган инсонпарварлик сиёсатининг амалий тасдиғи сифатида қабул қилинган. Унга мувофиқ, 215 нафар шахс афв этилган.

Бундан аввал Шавкат Мирзиёев Рамазон ҳайити муносабати билан 100 нафар ҳамда Наврўз байрами арафасида 140 нафар маҳкумни афв этган эди.