29 август куни АҚШнинг бир қанча штатларига ёпирилган «Ида» довули туфайли Миссисипи дарёсининг йўналиши ўзгарди. Бу ҳақда Қуйи Миссисипи ва кўрфаздаги сув ресурсларини ўрганиш марказининг етакчи гидрологи Скотт Перриэнга таяниб, CNN телеканали хабар берди. Марказ АҚШ Геология хизматининг таркибий бўлинмаси ҳисобланади.
«Бу вақт мобайнида дарё оқими секундига 2 футдан (тахминан 60 см/с) ярим футгача (15 см/с) секинлик билан бошқа йўналишга ўзгарди», — деди Перриэн.
У бу ҳодисани «ўта ғайриоддий» деб атади. Оқим йўналишидаги ўзгариш махсус датчик ёрдамида қайд этилган. Перриэн таъкидлашича, гап биринчи навбатда дарёнинг юқори қатламлари ҳақида бормоқда, чунки қурилма бутун дарё бўйича маълумотларни ёзмайди, чуқурликдаги қисмларда оқим ўзгармаган бўлиши мумкин.
Гидрологнинг сўзларига кўра, бўрон турли жойларда дарё сатҳини тахминан 1,5 фут (45 см)дан етти футгача (тахминан 2,1 м) кўтарган.
29 август куни АҚШнинг Мексика кўрфази соҳилига «Ида» бўрони кириб келди. Натижада, 30 август ҳолатига кўра, Луизиана штатидаги 869,2 мингдан ортиқ аҳоли электрсиз қолмоқда. Штатда жойлашган Ню-Орлеан шаҳри бутунлай электрдан узилган. Шу билан бирга, маҳаллий электр тармоқлари оператори вакилларининг огоҳлантиришича, сув тошқини ва электр узатиш линияларининг узилиши оқибатида минтақа аҳолиси бир неча ҳафта электрсиз қолиши мумкин. Ню-Орлеанда 400 мингга яқин аҳоли истиқомат қилади. Уларнинг аксарият қисми аллақачон эвакуация қилинган. Расмийлар ушбу аҳоли пунктининг бир қатор ҳудудларида кучли сув тошқини бўлиши мумкинлиги ҳақида огоҳлантирган — сув 2,7 метргача кўтарилиши мумкин.
Луизиана ва Миссисипи штатларида ҳукумат фавқулодда ҳолат эълон қилди. Луизиана губернатори Бел Эдвардс «Ида»ни 1850 йилдан буён штат тарихидаги энг кучли бўрон деб атади. Бўрон пайтида шамолнинг максимал тезлиги 150 м/с (240 км/соат) бўлган.
«Ида» хавфлилик даражаси бўйича бешта тоифадан тўртинчиси деб таснифланади. Бўрон бешинчи тоифага кўтарилиши мумкин.
Асеншен округи шерифининг идораси «Ида» бўронининг биринчи қурбони ҳақида хабар берди. Хабарга кўра, полиция кучли шамол туфайли маҳаллий аҳолидан бирининг уйига дарахт қулаб тушгани ҳақида мурожаат олган. Воқеа жойига етиб келган полиция ходимларининг маълум қилишича, у ерда номаълум шахс вафот этган.
АҚШ президенти Жо Байден «Ида» довули туфайли Луизиана штатини табиий офат ҳудуди деб эълон қилди. «Президент Жо Байден Луизиана штатида катта табиий офат содир бўлганини эълон қилди ҳамда «Ида» бўронидан зарар кўрган ҳудудларда штат ва маҳаллий тиклаш ишларига кўмаклашиш учун федерал ёрдам кўрсатишни буюрди», — дейилади Оқ уй хабарида.
Федерал ёрдам фуқароларни табиий офатлардан қутқаришда ёрдам бериш дастурларини, шу жумладан, вақтинчалик уй-жой учун ва уйларни таъмирлаш учун грантларни ўз ичига олади.
Изоҳ (0)