Suriya prezidenti Bashar Asad 2021-yilning 2-may kunigacha sodir etilgan jinoyatlar uchun umumiy amnistiya to‘g‘risidagi farmonni imzoladi, deb yozmoqda “Korrespondent.net”.
Foto: EPA
Pora berish, rasmiy hujjatlarni soxtalashtirish, giyohvand moddalar savdosi ayblovlari bilan sudlanganlar, shuningdek, balog‘atga yetmagan qonunbuzarlarga nisbatan amnistiya e’lon qilinadi. Farmon ba’zi holatlarda jazoni yengillashtirishni ham ko‘zda tutadi. Masalan, o‘lim jazosi katorgadagi bir umrlik mehnat bilan almashtiriladi. Shuningdek, bir umrlik katorga mehnatiga hukm qilinganlarning jazo muddati 20 yilgacha qisqartiladi.
Amnistiya odamlarning qurol kontrabandasi, davlat to‘ntarishi, josuslik va odamlarning o‘limiga sabab bo‘lgan terrorizmda ayblanganlar uchun qo‘llanilmaydi.
Qonundan yashirinib kelayotganlar o‘zini hukumat organlariga topshirsa, ularga ham amnistiya berilishi mumkin.
Eslatib o‘tamiz, 2021-yilning 26-may kuni Suriyada prezidentlik saylovlari bo‘lib o‘tadi. Saylovda qatnashish uchun 50 dan ortiq nomzod ariza topshirgan.
Shuningdek, Suriyada birinchi marta ayol kishi prezidentlik saylovida nomzod sifatida ro‘yxatdan o‘tdi. Associated Press’ning ma’lum qilishicha, damashqlik 50 yoshli ayol Faten Ali Naxar prezidentlik saylovlarida qatnashish haqida mustaqil ravishda qaror qabul qilgan. Lekin uning shaxsi haqida hech qanday batafsil ma’lumotlar keltirilmagan.
Lekin saylovlarda kamida 35 nafar deputatning ovozini to‘play oladigan nomzodlargina ishtirok eta oladi. Suriya Xalq Kengashi 250 deputatdan iborat ekani hisobga olinsa, nazariy jihatdan prezidentlik poygasida yetti kishidan ko‘p nomzod ishtirok eta olmaydi.
Avvalgi prezidentlik saylovi 2014-yilda bo‘lib o‘tgan edi. Unda 73,5 foiz suriyalik ishtirok etgan va ovozlarning 88,7 foizi bilan Arab sotsialistik uyg‘onish partiyasi yetakchisi Bashar Asad g‘olib bo‘lgan.
Suriya konstitutsiyasiga muvofiq, davlat rahbari yana bir marta yetti yillik muddatga qayta saylanish huquqiga ega.
