Блейк Лайвли ва Райан Рейнолдснинг севги ҳикояси

2022 йилда турмуш қурганининг 10 йиллигини нишонлайдиган машҳурлар — Райан Рейнолдс ва Блейк Лайвлининг севги ҳикояси ҳақида маълумот бериб ўтамиз.

Муносабатларга «яшил чироқ»

Райан ва Блейк 2010 йил ҳар «Яшил фонар» фильмининг суратга олиш майдончасида танишган. Бош қаҳрамон ролини гавдалантирган қаҳрамоннинг ҳар иккиси ҳам бу вақтда муносабатда бўлган. Рейнолдс Скарлетт Йоханссонга уйланган, Лайвли эса Леонардо Ди Каприо билан учрашган. Блейк ва Лайвли узоқ вақт давомида муносабатларини тан олмаган, аммо уларнинг ўртасида нимадир борлигини билиш учун юлдузларнинг тасдиғига ҳожат бўлмаган, чунки ҳаммаси шундоқ ҳам маълум бўлган. Бир-бирига бўлган қарашлари, гап-сўзлари ҳаммасини сотиб қўйган.

Мустаҳкамланган ришталар

Учрашишни бошлаганидан бир неча ой ўтиши билан жуфтлик биргаликда уй сотиб олган. 2012 йилнинг сентябрида эса Жанубий Каролинадаги гўзал маскан Boone Hall Plantation’да муносабатларини никоҳ билан мустаҳкамлаган. Блейк этаклари кенг, пушти олтин ипи билан тикилган Marсhesa брендидан кўйлак кийган. Айнан мазкур кўйлак билан уларнинг бахтли кунида эсда қоладиган ҳодиса содир бўлган. Маросимда британиялик Флоренс Уэльснинг қўшиғини берилиб тинглаётган Лайвли кўйлагини бенгал оловида куйдириб олгани ва ҳатто тешик пайдо бўлганига аҳамият бермаган. Хабар топганидан кейин даҳшатга тушган актрисага турмуш ўртоғи таскин берган. Райан бу билан Флоренс қўшиқ куйлагани ва бенгал олови бир умрлик эсдалик бўлиб қолишини айтиб, рафиқасининг кайфиятини кўтаришга уринган. Шундан кейин ўша тешик Блейк учун либоснинг энг севимли қисмига айланган.

Тўйдан кейин улар дастлаб Африка, кейин эса Канадага саёҳат қилган. 30 даража иссиқ ва 40 даража совуқ мамлакатларда бўлган жуфтлик олам-олам хотиралар билан қайтган. Юлдузлар муносабатларини кўз-кўз қилмасликни афзал билган. «Мен атайин шахсий ҳаётимни яширмайман. Шунчаки мендан муносабатларимга изоҳ беришни сўрасангиз, сўзлар менинг ҳақиқий туйғуларимни ифодалаб бера олмаслиги мумкин», — деган Райан. Илк бор машҳурлар расман жуфтлик сифатида 2012 йил Лондонда Sound of Change Live тадбирида кўриниш берган.

Фарзандли бўлиш бахти

2014 йил 16 декабрда Жеймс исмли қиз фарзанд дунёга келган. Илк бора ота бўлиш бахтига муяссар бўлган Райан бу ҳақида шундай деган: «Бола ажиб туйғуларни ҳис қилишингизга сабаб бўлади. Ўлгудек чарчоқ ва бахтни бир вақтнинг ўзида ҳис қиласиз». 2016 йил 28 сентябрда иккинчи қизи Инес, 2019 йилда учинчи қиз Бетти дунёга келган. Юлдузлар келажакда жами олти нафар фарзанди бўлишини орзу қилади.

Севги ва ҳазил

Кулги ва ҳазиллашган ҳолда муносабатда бўлиш жуфтликка бегона эмас. Буни уларнинг интервьюларидан ва ижтимоий тармоқлардаги расмлари ҳамда унга ёзилган изоҳлардан ҳам билса бўлади. Ҳазиллашишни яхши кўришдан ташқари, Блейк ва Райаннинг бир-бирини қадрлашига ҳам ҳавас қилса арзийди. Лайвли Рейнолдс учун ҳам рафиқа, энг яхши дўст, шунингдек, шахсий стилист ҳамдир. «Рафиқамнинг рухсатисиз мен уйдан чиқмайман. Расмий тадбирларга бормоқчи бўлганимда эса у мени костюмларимни назорат қилади — масалан, яқинда унинг рухсатига биноан фильм премьерасига оловранг бўйинбоғ тақдим. Йўқса, бунга қарор қилмаган бўлардим».

«У менинг бир қисмим, чунки бу ҳаётдаги ҳамма нарсани биз биргаликда бажарамиз. Агар фильм устида ишлайдиган бўлсам, у менга ёрдам беради, унга эса мен. Иш столидан тортиб тушлик учун овқатигача бўлган нарсаларни ҳам бирга танлаймиз. Қолаверса, у жуда яхши ёзувчи: у биз учун кўп нарсаларни ёзган. У барометр сингари мени жуда яхши билади ва нимани яхши, нимани эса яхшироқ бажаришим мумкинлигини айтиб туради», — деган Блейк.

10 йилдан буён бирга яшаб келаётган жуфтлик бир-биридан бир ҳафтадан узоқ вақтга ажралмасликни афзал билади. Блейк онгли равишда вақтининг асосий қисмини оиласига бағишлаган. Шунга қарамай баъзида фильмларда ҳам суратга тушиб туради ва турмуш ўртоғи бунда уни буткул қўллаб-қувватлайди. Киномукофотлардан бирини қўлга киритганида актриса Райансиз бунинг уддасидан чиқа олмаган бўлишини таъкидлаган. «Овоз берган ҳамма ва турмуш ўртоғимга раҳмат. У менинг борлиғим», — деган у.