26 август куни Кобул аэропортининг шарқий дарвозасида битта портлаш содир бўлган, иккинчи портлаш ҳақидаги маълумот тасдиқланмади. Бу ҳақда Пентагон вакили генерал Хенк Тэйлор брифингда маълум қилди, деб ёзади «РБК».

Хенк Тэйлор

Фото: Getty Images

«Тасдиқлашим мумкинки, бизнинг фикримизча, Барон меҳмонхонасида иккинчи портлаш бўлмаган. Аэропорт дарвозасида битта портлаш содир этилган», — деди Тэйлор.

Унинг сўзларига кўра, ноаниқ ахборотлар воқеалар тез ривожланаётган қийин шароитда нашр этилган. Тэйлор таъкидлашича, Пентагон уларни тузатиш ва тафсилотларга аниқлик киритиш зарур деб ҳисоблайди.

Бир кун олдин АҚШ Мудофаа вазирлиги Кобул аэропортида ва Барон меҳмонхонаси яқинида портлашлар содир бўлганини маълум қилганди.

Тэйлор 13 америкалик ҳарбий хизматчи ҳалок бўлганини тасдиқлади. Портлашда жароҳатланган барча америкаликлар — 18 киши аллақачон махсус рейс билан АҚШга етказилган ва касалхонага ётқизилган, дейди генерал.

Тэйлорнинг ишонтириб айтишича, АҚШ ва афғонистонлик иттифоқчиларни Кобул аэропортидан эвакуация қилиш операцияси давом этади ва жараён аввал эълон қилинганидек, 31 августда тугайди.

«Сўнгги 24 соат ичида Афғонистондан 300 дан ортиқ АҚШ фуқаролари эвакуация қилинди, уларнинг умумий сони тахминан 5,1 мингга етди», — деди Тэйлор.

Эслатиб ўтамиз, Кобул аэропорти яқинидаги терактдан кейин бир неча соат ўтиб, ИШИД портлаш учун жавобгарликни ўз зиммасига олган.

АҚШ президенти аэропорт яқинида ҳужум уюштирган одамлар қидириб топилиши ва бунга жавоб беришини айтди. «Биз кечирмаймиз. Биз унутмаймиз. Биз сизни қидириб топамиз ва жавоб беришга мажбур қиламиз», — деди Байден.

CBS News маълумотларига кўра, ҳаммаси бўлиб 170 дан ортиқ одам, асосан, мамлакатни тарк этмоқчи бўлган афғонлар, теракт қурбони бўлган. «Толибон» ҳужумни қоралади ва воқеада АҚШ ва унинг иттифоқчилари айбдорлигини маълум қилди. «У ерда бу тартибсизликни юзага келтирганлар бугунги ҳужум ва шунга ўхшаш ҳодисалар учун жавобгардир», — деди «Толибон» вакили Вардак Алханафий.

Таъкидлаш жоиз, портлашлардан аввалроқ ҳаракат аэропорт атрофида ИШИД томонидан эҳтимолий терактлар хавфи ҳақида огоҳлантирган эди.