Фарғона вилояти Қувасой шаҳрида фуқарога 10 сотих ер майдони олиб беришни ваъда қилган фирибгар ушланди, дея хабар бермоқда Бош прокуратура ҳузуридаги Департамент матбуот хизмати.
Қайд этилишича, Департамент ҳамда ДХХнинг Қувасой шаҳар бўлимлари томонидан ўтказилган тезкор тадбирда фуқаро Х.А. аслида захирада бўлган «Пакана» МФЙ ҳудудида жойлашган 10 сотих ер майдонини бошқа бир фуқаро О.га фирибгарлик йўли билан 5500 АҚШ долларига сотишга келишиб, кейинчалик ҳужжатларни унинг номига расмийлаштириб беришини айтиб, олдиндан 2500 АҚШ долларини олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Бундан аввал Қашқадарёда фирибгарлик жиноятини содир этиб, жавобгарликдан қочиб юрган косонлик фуқаро Деҳқонободда қўлга олингани, Тошкентда фуқарони Қирғизистонга ўқишга киритиб, уни Тошкентдаги фармацевтика институтига кўчириб бериш учун 3,5 минг доллар сўраган шахс ушлангани ҳамда Бухорода кўп қаватли уй-жой қуриш учун ер майдони ажратиш эвазига 10 минг доллар талаб қилган шахс қўлга олингани ҳақида хабар берилганди.
Изоҳ (0)