Токиода бўлиб ўтадиган Паралимпия ўйинларида Ўзбекистон делегациясининг байроқдори ўзгарди. Бу ҳақда Туризм ва спорт вазирлиги матбуот хизмати хабар бермоқда.
Қайд этилишича, Паралимпия делегацияси таркибидаги дзюдочиларда бир нафардан спортчи ва мураббийда коронавирус аниқланган. Шу боис самолётда уларга яқин масофада бўлган байроқдор параенгил атлетикачи Нурхон Қурбонова эҳтиёт чораси сифатида карантинга олинган.
Эндиликда унинг ўрнига Паралимпия ўйинларининг очилиш маросимида Ўзбекистон байроқдори сифатида параканоэ бўйича Жаҳон чемпиони Шаҳноза Мирзаева чиқиш қилади. Унга параенгил атлетикачи Муҳаммад Рихсимов ҳамроҳлик қилади.
Паралимпия ўйинлари 24 августдан 5 сентябрга бўлган муддатда бўлиб ўтади. Ўзбекистон 48 спортчи билан 55 та йўлланмага сазовор бўлган. Мусобақанинг очилиш маросими 24 август куни Тошкент вақти билан соат 16:00 да бошланади.
Қайд этиш ўринли, бунгача Олимпия ўйинларида ҳам очилиш маросимига бир кун қолганида байроқдорлар ўзгартирилганди. Боксчи Бобоусмон Ботуров ва спорт гимнастикачиси Оксана Чусовитанинг ўрнини боксчи Баҳодир Жалолов ва таэквондочи Нигора Турсунқулова эгаллаганди.
Изоҳ (0)