Чет эл клубларида фаолият юритаётган ўзбекистонлик футболчиларнинг айримлари ортда қолган ҳафтада ўз жамоаси сафида навбатдаги ўйинларини ўтказди.
Италия. Элдор Шомуродов «Рома» сафида А Сериядаги дебютини ўтказди. «Фиорентина»га қарши кечган 1-тур баҳсида Элдор 69-дақиқада захирадан майдонга туширилди. Ўзбекистонлик ҳужумчи жамоасининг учинчи голига ассистентлик қилди. «Рома» бу баҳсда 3:1 ҳисобидаги ғалабани қўлга киритди.
Беларусь. Олий Лиганинг 20-турида ўзбекистонлик футболчилар тўқнашуви бўлиб ўтди. Шаҳбоз Умаровнинг «БАТЭ»си «Энергетик-БГУ» меҳмони бўлди. Умаров тўлиқ ҳаракат қилган бўлса, Дониёр Абдуманнопов 46-дақиқа, Шаҳзод Убайдуллаев 66-дақиқагача ҳаракат қилди, Бобур Абдухолиқов эса 46-дақиқада захирадан майдонга тушди. Учрашув 1:1 ҳисоби билан якунланди. Минскликларнинг голига Убайдуллаев муаллиф бўлди.
Россия. «Уфа»га қайтган Остон Ўрунов «Зенит»га қарши баҳсда захирадан майдонга тушди. Уфаликлар бу ўйинда (1:1) амалдаги чемпиондан очко тортиб олди.
Саудия Арабистони. «Ан-Насср» сафарда «Ал-Файсали»га қарши баҳс олиб борди. Тезкор гол орқали олдинга ўтиб олган Ар-Риёд клуби кейинчалик иккита гол ўтказиб юборди ва ғалабани қўлдан чиқарди. Жалолиддин Машарипов асосий таркибда майдонга тушди ва 84-дақиқада захирага олинди.
Жанубий Корея. «Соннам» ўз уйида «Чонбук Моторс» билан нурсиз дуранг ўйнади. Жамшид Искандаров 86-дақиқада захирадан майдонга тушди. Рустам Ашурматов жамоаси иштирокидаги ўйин эса қолдирилди.
Кей-Лига 2 да ҳаракат қилаётган «Тежон Ситизен» 26-турда «Кённам»ни қабул қилди ва 84-дақиқадаги гол эвазига ғалаба қозонди. Икром Алибоев учрашувда тўлиқ ҳаракат қилди.
Изоҳ (0)