Токио—2020 Олимпиадасида олтин медални қўлга киритган ўзбекистонлик боксчи Баҳодир Жалоловга Сурхондарё вилояти ҳокимлиги томонидан Skoda Kodiaq автомобили топширилди.
Сўнгги йилларда боксчиларга машина ёки уй совға қилиниши янгилик эмас. «Дарё» Ўзбекистон бокс терма жамоаси етакчиси шу вақтга қадар қўлга киритган мукофотларни санаб ўтади.
Жалоловнинг асосий муваффақиятлари 2019 йилдан бошланди. Таиландда ўтган Осиё чемпионатида олтин медални қўлга киритган Баҳодирга Термиз марказидан икки хонали уй калити топширилди.
Ўша йили Россиянинг Екатеринбург шаҳрида бўлиб ўтган Жаҳон чемпионатида биринчи ўринни олгач, совғалар қуршовида қолди. Аввалига бошқа чемпионлар қатори унга Chevrolet Tracker автомобили мукофот тариқасида берилди.
Tracker’дан ҳеч қанча ўтмай, мусобақанинг энг яхши боксчиси сифатида эътироф этилган Баҳодир Жалоловга Тошкент шаҳридан уй совға қилинди.
Сурхондарёда ҳам Баҳодирнинг ютуғи юқори баҳоланди. Вилоят ҳокимлиги боксчига 200 миллион сўм миқдорида пул мукофоти берди.
Боксчи Токио Олимпиадасига йўлланма олди. Олимпиада лицензиясини қўлга киритганлар қаторида Баҳодирга ҳам 100 миллион сўм миқдорида рағбатлантириш берилди.
Олимпия ўйинларидаги ғолиблик орқали Жалолов Президент томонидан ваъда қилинган 200 минг АҚШ долларига эга чиқди. Чемпион Тошкентга етиб келгач, унга Chevrolet Tahoe автомобили калити топширилди. Шунингдек, олтин медал эгаларига Тошкент шаҳридан 3 хонали 4 сотихли ҳовли берилди.
Сурхондарё ҳокимлиги ҳам Баҳодирнинг ютуғини бефарқ қолдирмади ва унга Skoda Kodiaq автомобилини топширди.
Изоҳ (0)