Ўзбекистонда эндиликда тадбиркорларга кредитни миллий валюта – сўмда ва бизнес вакиллари учун мақбул фоизларда бериш тизими йўлга қўйилади. Бу ҳақда айни пайтда бўлиб ўтаётган Президент Шавкат Мирзиёевнинг тадбиркорлар билан очиқ мулоқотида қайд этилди, дея хабар бермоқда «Дарё» мухбири.
Давлат раҳбарининг таъкидлашича, банклар томонидан келгуси йили халқаро молия бозорларида 5 триллион сўмлик миллий валютада евробондлар чиқарилади. Шунингдек, Ўзбекистон бозорида ишлашга тайёр бўлган, замонавий технологияларга эга йирик хорижий банкларни кириб келишига кенг имкониятлар яратилади. Бу ҳам ўз навбатида тадбиркорлар учун қулай шароитлар тақдим этади ва банк тизимида биз учун ниҳоятда керак бўлган, соғлом рақобат пайдо бўлади.
«Бугунги йиғилишда қатнашаётган ҳар бир банк раҳбари ‘тобора кучайиб бораётган рақобатга муносиб бўлиш ҳамда тадбиркорларни рози қилиш учун, нимани ўзгартиришим керак’, деган саволни ўзига бериши ва жиддий хулоса қилиши лозим. Бундан ташқари, банклар четдан ресурсни қандай валютада жалб қилишидан қатъий назар, тадбиркорларга кредитни миллий валюта – сўмда ва бизнес вакиллари учун мақбул фоизларда бериш тизими йўлга қўйилади.
Валютада кредит олган ва бугун қийин аҳволга тушиб қолган юзлаб тадбиркорларимиз, ушбу масалани ўз мурожаатларида кўтарганлар», — дейди давлат раҳбари.
Президентнинг қайд этишича, Молия вазирлиги ҳузурида Валюта хатарларини бошқариш компанияси ва ҳудудларда унинг филиаллари ташкил этилади.
Изоҳ (0)